វ៉ាស៊ីនតោន៖ ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី២៥ ខែមីនា ឆ្នាំ២០២០ថា លោក Michael Waltz ទីប្រឹក្សាសន្តិសុខជាតិរបស់សហរដ្ឋអាមេរិក បានអះអាងទទួលខុសត្រូវទាំងស្រុង សម្រាប់ការជជែកជាក្រុមដែលលេចធ្លាយ ពិភាក្សាអំពីការវាយប្រហារ នាពេលខាងមុខនៅក្នុងប្រទេសយេម៉ែន។
បើទោះបីជាមានរឿងបែបនេះក្ដី ប្រធានាធិបតីអាមេរិក លោក ដូណាល់ ត្រាំ បានបន្ដគាំទ្រទីប្រឹក្សាសន្តិសុខជាតិ របស់លោក គឺលោក Mike Waltz បន្ទាប់ពីនិពន្ធនាយករបស់ទស្សនាវដ្ដី The Atlantic ត្រូវបានបន្ថែមដោយចៃដន្យ ក្នុងការជជែកជាក្រុម Signal ដែលជាកន្លែងដែលមន្ត្រីសន្តិសុខជាតិ កម្រិតខ្ពស់កំពុងពិភាក្សាអំពីផែនការ យោធានៅក្នុងប្រទេសយេម៉ែន។
លោក ត្រាំ បានឲ្យដឹងនៅក្នុងបទសម្ភាសន៍តាមទូរស័ព្ទជាមួយ NBC News ថា “លោកMichael Waltz បានរៀនមេរៀនមួយ ហើយគាត់ជាមនុស្សល្អ” ។ នៅពេលសួរថាតើលោកត្រូវបានគេប្រាប់អំពីវិធីណា ដែលលោក Goldberg ចូលមកក្នុង Signal Chat លោក ត្រាំ បានឲ្យដឹងថា “វាគឺជាមនុស្សរបស់ Michael នៅលើទូរស័ព្ទ។ បុគ្គលិកម្នាក់មានលេខរបស់លោកនៅទីនោះ” ។
លោក ត្រាំ ក៏បានឲ្យដឹងផងដែរថា វត្តមានរបស់លោក Goldberg នៅក្នុងការជជែកមិនមាន ផលប៉ះពាល់អ្វីទាំងអស់លើប្រតិបត្តិការយោធា ប្រឆាំងនឹងកងកម្លាំងក្រុមហ៊ូទី ក្នុងប្រទេសយេម៉ែន នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ការកត់សម្គាល់របស់លោក ត្រាំ បានកើតឡើងមួយថ្ងៃបន្ទាប់ពីលោក Jeffrey Goldberg ដែលជានិពន្ធនាយកនៃទស្សនាវដ្ដី The Atlantic បាននិយាយនៅក្នុងអត្ថបទមួយកាលពីថ្ងៃចន្ទថា មន្ត្រីសន្តិសុខជាតិជាន់ខ្ពស់ របស់សហរដ្ឋអាមេរិកថ្មីៗនេះបានបន្ថែមលោកទៅក្នុងក្រុម Signal ជជែកពិភាក្សាអំពីការវាយប្រហារយោធា លើកងកម្លាំងក្រុមហ៊ូទី ក្នុងប្រទេសយេម៉ែន។ លោកបានលើកឡើងថា លោកបានដឹងពីផែនការវាយប្រហារតាមអាកាស ប្រហែលពីរម៉ោងមុនប្រតិបត្តិការរបស់អាមេរិក។
លោក Goldberg បានឲ្យដឹងនៅក្នុងអត្ថបទថា “ខ្ញុំមិនដែលឃើញការរំលោភបំពានបែបនេះទេ” ។ នៅពេលត្រូវបានសួរដោយប្រព័ន្ធផ្សព្វផ្សាយអំពីរឿងនេះ រដ្ឋមន្ត្រីការពារជាតិលោក Pete Hegseth បានឲ្យដឹងថា “គ្មាននរណាម្នាក់កំពុងផ្ញើសារអំពីផែនការសង្គ្រាមនោះទេ។ ហើយនោះជាអ្វីដែលខ្ញុំត្រូវនិយាយអំពីរឿងនោះ” ។ រដ្ឋមន្រ្តីការពារជាតិរូបនេះ ក៏បានរិះគន់លោក Goldberg ដោយហៅលោកថាជា “អ្នកកាសែត” ដែលបោកបញ្ឆោត និងគួរឱ្យស្អប់ ដែលបានបង្កើតវិជ្ជាជីវៈបោកបញ្ឆោតម្តងហើយម្តងទៀត។
ឧបទ្ទវហេតុនេះបានធ្វើឲ្យ មានការព្រួយបារម្ភយ៉ាងខ្លាំង និងមានការរិះគន់យ៉ាងខ្លាំង។ លោក Jack Reed ដែលជាប្រធានគណៈកម្មាធិការសេវាកម្មប្រដាប់អាវុធរបស់ព្រឹទ្ធសភាបានឲ្យដឹងនៅក្នុងសេចក្តីថ្លែងការណ៍មួយថា “ប្រសិនបើជាការពិត រឿងនេះតំណាងឱ្យការបរាជ័យ ដ៏ធ្ងន់ធ្ងរបំផុតមួយនៃប្រតិបត្តិការសន្តិសុខ និងសុភវិនិច្ឆ័យដែលខ្ញុំធ្លាប់បានឃើញ” ។
សមាជិកព្រឹទ្ធសភា គណបក្សប្រជាធិបតេយ្យបានបន្ដថា “ប្រតិបត្តិការយោធាចាំបាច់ ត្រូវដោះស្រាយដោយការប្រុងប្រយ័ត្នបំផុត ដោយប្រើបណ្តាញទំនាក់ទំនងដែលមានការយល់ព្រម និងសុវត្ថិភាព ពីព្រោះជីវិតរបស់ជនជាតិអាមេរិក គឺស្ថិតនៅលើបន្ទាត់។ ការធ្វេសប្រហែសដែលបង្ហាញដោយគណៈរដ្ឋមន្ត្រីរបស់ប្រធានាធិបតីលោក ត្រាំ គឺគួរឱ្យភ្ញាក់ផ្អើល និងគ្រោះថ្នាក់ ខ្ញុំនឹងស្វែងរកចម្លើយពីរដ្ឋបាលភ្លាមៗ” ៕
ប្រែសម្រួល ឈូក បូរ៉ា
