តូក្យូ៖ នាយករដ្ឋមន្ត្រីជប៉ុនលោក Shigeru Ishiba បានព្រមានថា ផែនការរបស់រដ្ឋាភិបាលសហរដ្ឋអាមេរិកក្នុងការដាក់ពន្ធបន្ថែម ២៥ ភាគរយលើការនាំចូលរថយន្តនឹងមានឥទ្ធិពលយ៉ាងខ្លាំងទៅលើសេដ្ឋកិច្ចជប៉ុន។ លោកបានប្រាប់គណៈកម្មាធិការសភាមួយថា “យើងនឹងគិតអំពីមធ្យោបាយដ៏មានប្រសិទ្ធភាពបំផុត ដើម្បីធ្វើឱ្យសហរដ្ឋអាមេរិកយល់ថា នេះនឹងមិនមានផលប្រយោជន៍អ្វីឡើយ” ។
ប្រធានាធិបតីអាមេរិក លោក ដូណាល់ ត្រាំ បានឲ្យដឹងថា លោកនឹងចាប់ផ្តើមដាក់ពន្ធបន្ថែម ២៥ ភាគរយនៅសប្តាហ៍ក្រោយលើរថយន្តទាំងអស់ ដែលផលិតនៅក្រៅប្រទេសរបស់លោក ដោយមិនលើកលែងសូម្បីតែប្រទេសជប៉ុន ឬដៃគូពាណិជ្ជកម្មណាមួយពីវិធានការចុងក្រោយបង្អស់ ដែលអាចរំខានដល់ខ្សែសង្វាក់ផ្គត់ផ្គង់ និងធ្វើឱ្យខូចដល់កំណើនសេដ្ឋកិច្ចទូទាំងពិភពលោក។
សេតវិមានបានឲ្យដឹងថា ពន្ធខ្ពស់ដែលផ្តោតលើយានយន្តដឹកអ្នកដំណើរគ្រប់ប្រភេទ និងរថយន្តដឹកទំនិញធុនស្រាលនឹងចូលជាធរមាននៅថ្ងៃទី ៣ ខែមេសា។ អត្រាពន្ធនាំចូលដូចគ្នានឹងត្រូវបានអនុវត្ត ចំពោះគ្រឿងបន្លាស់រថយន្តមួយចំនួន រួមទាំងម៉ាស៊ីន ប្រអប់លេខ និងគ្រឿងបន្លាស់ នេះបើយោងតាមការចុះផ្សាយរបស់ទីភ្នាក់ងារសារព័ត៌មានក្យូដូជប៉ុន។
លោក ត្រាំ បានប្រាប់អ្នកយកព័ត៌មាននៅក្នុងការិយាល័យ Oval ថា “យើងនឹងគិតថ្លៃប្រទេសនានា សម្រាប់ការធ្វើអាជីវកម្មនៅក្នុងប្រទេសរបស់យើង ហើយទទួលយកការងាររបស់យើង យកទ្រព្យសម្បត្តិរបស់យើង ទទួលយកអ្វីៗជាច្រើនទៀត ពួកគេបានយកយ៉ាងច្រើនចេញពីប្រទេសរបស់យើង មិត្ត និងសត្រូវដូចគ្នា និយាយដោយត្រង់ទៅ មិត្តតែងតែអាក្រក់ជាងសត្រូវ”។
លោក ត្រាំ បានលើកឡើងថាលោកនឹងរក្សាពន្ធកើនឡើងពី ២.៥ ភាគរយបច្ចុប្បន្នសម្រាប់រថយន្តដឹកអ្នកដំណើរសម្រាប់រយៈពេលនៃអាណត្តិរបស់លោក ក្នុងការប៉ុនប៉ងធ្វើឱ្យផលិតកម្មក្នុងស្រុកមានភាពរស់រវើក ទាក់ទាញការវិនិយោគបន្ថែមទៀតចូលទៅក្នុងសហរដ្ឋអាមេរិក និងបន្ថែមអ្វីដែលលោកអះអាងថានឹងមានចំនួនច្រើនជាង ១០០ពាន់លានដុល្លារនៃប្រាក់ចំណូលពន្ធប្រចាំឆ្នាំ។
លោកបានបន្តថា «ខ្ញុំគិតថាអាជីវកម្មរថយន្តរបស់យើងនឹងរីកចម្រើនដូចដែលវាមិនដែលរីកចម្រើនពីមុនមក»។ មន្ត្រីសេតវិមានបានឲ្យដឹងថា ការដំឡើងពន្ធនេះមានន័យថា ពន្ធថ្មីនឹងមាន ២៧.៥ ភាគរយលើរថយន្តដឹកអ្នកដំណើរ និង ៥០ ភាគរយលើរថយន្តធុនស្រាល។ ចំពោះគ្រឿងបន្លាស់រថយន្តសំខាន់ៗ ការប្រកាសដែលចុះហត្ថលេខាដោយលោក ត្រាំ បានផ្តល់ការបន្ធូរបន្ថយរយៈពេលមួយខែរហូតដល់ថ្ងៃទី ៣ ខែឧសភា។
សកម្មភាពពាណិជ្ជកម្មចុងក្រោយបង្អស់របស់លោក ត្រាំ អាចជះឥទ្ធិពលយ៉ាងខ្លាំងទៅលើក្រុមហ៊ុនផលិតរថយន្តជប៉ុន អាល្លឺម៉ង់ កូរ៉េខាងត្បូង និងក្រុមហ៊ុនបរទេសផ្សេងទៀត ក៏ដូចជាគូប្រជែងរបស់អាមេរិករបស់ពួកគេផងដែរ ដែលផលិតភាគរយដ៏សំខាន់នៃរថយន្តរបស់ពួកគេនៅខាងក្រៅសហរដ្ឋអាមេរិក និងទិញគ្រឿងបន្លាស់ពីជុំវិញពិភពលោក។
ដោយសារតែខ្សែសង្វាក់ផ្គត់ផ្គង់ដ៏ស្មុគស្មាញនៅក្នុងឧស្សាហកម្មរថយន្ត ពាក់ព័ន្ធនឹងអ្នកផ្គត់ផ្គង់ជាច្រើន និងតម្រូវការសម្រាប់អ្នកផលិតក្នុងការវិនិយោគដ៏ធំនៅក្នុងបច្ចេកវិទ្យា និងរោងចក្រ មុនពេលពួកគេបញ្ចេញម៉ូដែលថ្មី វាមិនមែនជាដំណើរការរហ័ស ឬងាយស្រួលក្នុងការផ្លាស់ប្តូរផលិតកម្មរថយន្តទៅកាន់បន្ទាត់ថ្មីនៅក្នុងសហរដ្ឋអាមេរិក ដូចដែលចង់បានដោយលោក ត្រាំ នោះទេ៕
ប្រែសម្រួល ឈូក បូរ៉ា
