ព័ត៌មានអន្តរជាតិ

ប្រេស៊ីល ថ្កោលទោសការដាក់ពន្ធគយរបស់អាមេរិក និងគំរាមចាត់វិធានការយកពន្ធទៅវិញទៅមក

afp

រីយ៉ូ៖ ប្រធានាធិបតីប្រេស៊ីលលោក Luiz Inacio Lula da Silva បានរិះគន់ពន្ធគយថ្មីៗដែលដាក់ដោយសមភាគីអាមេរិកលោក ដូណាល់ ត្រាំ ដោយព្រមានថា ប្រទេសរបស់លោកអាចចាត់វិធានការពាណិជ្ជកម្មទៅវិញទៅមកប្រឆាំងនឹងសហរដ្ឋអាមេរិក នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។

លោក Lula da Silva បានប្រាប់សន្និសីទសារព័ត៌មានមួយនៅចុងបញ្ចប់នៃដំណើរទស្សនកិច្ចផ្លូវការរបស់គាត់ទៅកាន់ប្រទេសជប៉ុនថា “ខ្ញុំមានការព្រួយបារម្ភយ៉ាងខ្លាំងអំពីអាកប្បកិរិយារបស់រដ្ឋាភិបាលសហរដ្ឋអាមេរិក ជាមួយនឹងគោលនយោបាយពន្ធលើផលិតផលទាំងអស់ពីគ្រប់ប្រទេសទាំងអស់” ។

លោកក៏បានសម្តែងការព្រួយបារម្ភអំពីការសម្រេចចិត្តរបស់លោក ត្រាំ ក្នុងការដាក់ពន្ធ ២៥ភាគរយលើការនាំចូលរថយន្តដោយថា វិធានការការពារបែបនេះនឹងជំរុញតម្លៃរថយន្តសម្រាប់អ្នកប្រើប្រាស់អាមេរិក ហើយអាចនាំឱ្យមានការកើនឡើងអតិផរណា និងអត្រាការប្រាក់ខ្ពស់។

លោក Lula da Silva បានលើកឡើងថា “ខ្ញុំព្រួយបារម្ភព្រោះទីបំផុត វាជាពាណិជ្ជកម្មសេរីដែលកំពុងរងគ្រោះថ្នាក់។ ខ្ញុំព្រួយបារម្ភដោយសារតែពហុភាគីនិយមត្រូវបានចាញ់។ ខ្ញុំព្រួយបារម្ភព្រោះប្រធានាធិបតីសហរដ្ឋអាមេរិក មិនមែនជាអ្នកការពាររបស់ពិភពលោក លោកគ្រាន់តែជាប្រធានាធិបតីសហរដ្ឋអាមេរិកប៉ុណ្ណោះ”។

នៅលើការសម្រេចចិត្តរបស់ទីក្រុងវ៉ាស៊ីនតោន កាលពីដើមខែនេះក្នុងការដាក់ពន្ធ ២៥ភាគរយលើដែកថែបនិងអាលុយមីញ៉ូមរបស់ប្រេស៊ីល Lula da Silva បានឲ្យដឹងថា រដ្ឋាភិបាលរបស់លោកនឹងនាំយកករណីនេះទៅអង្គការពាណិជ្ជកម្មពិភពលោក (WTO) ។ លោកបានបន្ដថា “យើងមិនអាចឈរដោយស្ងៀមស្ងាត់បានទេ។ យើងនឹងអំពាវនាវទៅកាន់អង្គការពាណិជ្ជកម្មពិភពលោក ហើយប្រសិនបើវាបរាជ័យ យើងនឹងអនុវត្តការតបស្នង ដោយការបង្កើតពន្ធលើផលិតផលសហរដ្ឋអាមេរិក” ។

លោក បានបន្ថែមថា គាំពារនិយមឯកតោភាគីធ្វើឱ្យប៉ះពាល់ដល់កិច្ចសហប្រតិបត្តិការសេដ្ឋកិច្ចពិភពលោក និងធ្វើឱ្យអន្តរាយដល់ពហុភាគីនិយម ដោយសម្តែងក្តីសង្ឃឹមថាប្រទេសផ្សេងទៀត ដែលរងផលប៉ះពាល់ដោយពន្ធចុងក្រោយរបស់សហរដ្ឋអាមេរិក ក៏នឹងនាំយកករណីរបស់ពួកគេទៅកាន់ WTO និងអនុម័តវិធានការទៅវិញទៅមកប្រសិនបើចាំបាច់៕

ប្រែសម្រួល ឈូក បូរ៉ា

To Top