តូក្យូ៖ រដ្ឋមន្ត្រីការពារជាតិជប៉ុន លោក Gen Nakatani និងសមភាគីអាមេរិក លោក Pete Hegseth បានព្រមព្រៀងគ្នា ដើម្បីពន្លឿនកិច្ចខិតខំប្រឹងប្រែង ដើម្បីពង្រឹងការរារាំងរបស់សម្ព័ន្ធមិត្ត ចំពេលមានការអះអាងកាន់តែខ្លាំងឡើង របស់ប្រទេសចិន នៅក្នុងតំបន់ ខណៈដែលការអះអាងពីវឌ្ឍនភាព ក្នុងការធ្វើឱ្យប្រសើរឡើងនូវក្របខ័ណ្ឌបញ្ជាការ សម្រាប់ការសម្របសម្រួល កាន់តែរលូនរវាងកងកម្លាំង របស់ប្រទេសទាំងពីរ។
កិច្ចព្រមព្រៀងដែលសម្រេចបានក្នុងអំឡុងដំណើរទស្សនកិច្ចលើកដំបូងរបស់លោក Hegseth ទៅកាន់ប្រទេសជប៉ុន ក្នុងនាមជាប្រធានមន្ទីរបញ្ចកោណ បានគូសបញ្ជាក់ពីភាពរឹងមាំនៃទំនាក់ទំនងទ្វេភាគី សូម្បីតែនៅក្រោមរដ្ឋបាល របស់ប្រធានាធិបតីអាមេរិកលោក ដូណាល់ ត្រាំ ដែលបានបង្កើនការ ព្រួយបារម្ភអំពីការរឹតបន្តឹង សម្ព័ន្ធភាពយូរអង្វែងជាមួយនឹងការ ទាមទារឱ្យមានការបង្កើនការ ចំណាយលើវិស័យការពារជាតិ។
ដោយលើកឡើងពីបរិយាកាសសន្តិសុខកាន់តែធ្ងន់ធ្ងរ និងស្មុគ្រស្មាញ លោក Nakatani បានប្រាប់សន្និសីទសារព័ត៌មានរួមគ្នាជាមួយលោក Hegseth បន្ទាប់ពីកិច្ចប្រជុំ របស់ពួកគេនៅទីក្រុងតូក្យូថា អ្នកទាំងពីរ “បានបញ្ជាក់ពីដំណោះស្រាយដើម្បីឆ្ពោះទៅមុខដោយភាពបន្ទាន់” លើគំនិតផ្តួចផ្តើម ដើម្បីពង្រឹងសមត្ថភាព សម្ព័ន្ធភាពដើម្បីទប់ស្កាត់ និងឆ្លើយតប។
លោក Hegseth បានលើកឡើងថា សហរដ្ឋអាមេរិកឈររួមគ្នាជាមួយប្រទេសជប៉ុន “ប្រឈមមុខនឹងសកម្មភាពឈ្លានពាន និងបង្ខិតបង្ខំដោយពួកកុម្មុយនិស្តចិន” ហើយបានសង្កត់ធ្ងន់ថា ប្រជាជាតិរបស់គាត់ប្តេជ្ញារក្សា “ការទប់ស្កាត់ដ៏រឹងមាំ ត្រៀមខ្លួនជាស្រេច និងគួរឱ្យទុកចិត្តនៅក្នុងឥណ្ឌូប៉ាស៊ីហ្វិក រួមទាំងឆ្លងកាត់ច្រកសមុទ្រតៃវ៉ាន់”។
ក្រសួងការពារជាតិជប៉ុនបានឲ្យដឹងថា ប្រមុខការពារជាតិនៃប្រទេសទាំងពីរបានព្រមព្រៀងគ្នាថា ពួកគេប្រឆាំងនឹង “ការប៉ុនប៉ងឯកតោភាគីណាមួយ ដើម្បីផ្លាស់ប្តូរស្ថានភាពបច្ចុប្បន្នដោយកម្លាំង ឬការបង្ខិតបង្ខំ” ដោយទីក្រុងប៉េកាំង រួមទាំងនៅក្នុងសមុទ្រចិនខាងកើត និងខាងត្បូង នេះបើយោងតាមការចុះផ្សាយរបស់ទីភ្នាក់ងារសារព័ត៌មានក្យូដូជប៉ុន ។
ប្រទេសចិន បាននឹងកំពុងបង្កើនការអះអាង របស់ខ្លួនជុំវិញប្រជុំកោះសេនកាគូ ដែលគ្រប់គ្រងដោយជប៉ុន នៅក្នុងសមុទ្រចិនខាងកើត ជាមួយនឹងកប៉ាល់ឆ្មាំឆ្នេរសមុទ្រ ម្តងហើយម្តងទៀតចូលទៅក្នុងដែនទឹកក្បែរនោះ។ ប្រទេសចិន ក៏បានទាមទារអធិបតេយ្យភាព លើស្ទើរតែទាំងអស់នៃសមុទ្រចិនខាងត្បូង ដែលជាជម្រកនៃផ្លូវសមុទ្រដ៏មមាញឹកបំផុតមួយរបស់ពិភពលោកផងដែរ៕
ប្រែសម្រួល ឈូក បូរ៉ា
