បរទេស៖ យោងតាមការចេញផ្សាយរបស់ RT រដ្ឋាភិបាលទីក្រុងញូវដែលីបានច្រានចោល របាយការណ៍មួយរបស់កាសែត New York Times (NYT) ដែលបានចោទប្រកាន់ក្រុមហ៊ុនការពារជាតិ និងអវកាសដ៏ធំបំផុតមួយរបស់ប្រទេសឥណ្ឌា ពាក់ព័ន្ធនឹងការបញ្ជូនទំនិញ ដែលផលិតដោយចក្រភពអង់គ្លេសទៅកាន់ប្រទេសរុស្ស៊ី។
ប្រភពពីរដ្ឋាភិបាលឥណ្ឌា បានហៅរបាយការណ៍នេះថា ជាព័ត៌មានមិនត្រឹមត្រូវ និងធ្វើឱ្យមានការយល់ច្រឡំ ដោយបដិសេធការអះអាងប្រឆាំងនឹងក្រុមហ៊ុន Hindustan Aeronautics Limited (HAL) ដែលជាក្រុមហ៊ុនយក្សគ្រប់គ្រងដោយរដ្ឋដែល ផលិតយន្តហោះចម្បាំង ឧទ្ធម្ភាគចក្រ ម៉ាស៊ីនយន្តហោះ អាកាសចរណ៍ និងគ្រឿងបន្លាស់ផ្សេងៗ។
របាយការណ៍របស់កាសែត New York Timesដែលបានចេញផ្សាយកាលពីថ្ងៃសុក្របាន អះអាងថាក្រុមហ៊ុនផលិតយន្តហោះអង់គ្លេស H.R. Smith Group បានដឹកជញ្ជូនឧបករណ៍មួយចំនួនទៅ HAL ដែលជាដៃគូពាណិជ្ជកម្មដ៏ធំបំផុតមួយរបស់ Rosoboronexport ដែលត្រូវបានដាក់ទណ្ឌកម្មដោយចក្រភពអង់គ្លេស សហរដ្ឋអាមេរិក និងសហភាពអឺរ៉ុប ចាប់តាំងពីឆ្នាំ២០២២ ដែលជាផ្នែកមួយនៃការផ្លាស់ប្តូរដ៏ទូលំទូលាយដោយ រដ្ឋាភិបាលលោកខាងលិច។
របាយការណ៍នេះបានចោទប្រកាន់ ដោយមិនផ្តល់ភស្តុតាងណាមួយថា HAL ក្នុងករណីខ្លះ បញ្ជូនទំនិញដែលនាំចូលពីក្រុមហ៊ុនចក្រភពអង់គ្លេសទៅប្រទេសរុស្ស៊ី។ ទោះយ៉ាងណាក៏ដោយ N.R. Smith បានបដិសេធរឿងនេះ ហើយ NYT ខ្លួនឯងបានកត់សម្គាល់នៅក្នុងរបាយការណ៍ថា កំណត់ត្រាមិនបង្ហាញថា ផលិតផលរបស់ N.R. Smith ដែលបានទៅដល់ដៃប្រទេសរុស្ស៊ីនោះទេ៕
ប្រែសម្រួល៖ស៊ុនលី
