វ៉ាស៊ីនតោន៖ ប្រធានាធិបតីអាមេរិក លោក ដូណាល់ ត្រាំ បានឲ្យដឹងថា មានការទំនាក់ទំនង រវាងរដ្ឋបាលរបស់លោក និងកូរ៉េខាងជើង ដែលលោកបានពណ៌នាថាជា “ប្រទេសនុយក្លេអ៊ែរដ៏ធំ” ដោយបន្ថែមថា លោកនឹងប្រហែលជា “ធ្វើអ្វីមួយនៅពេលណាមួយ” នេះបើយោងតាមការចុះផ្សាយរបស់ទីភ្នាក់ងារសារព័ត៌មានក្យូដូជប៉ុន។
លោក ត្រាំ បានធ្វើសេចក្តីថ្លែងការណ៍ ជាការឆ្លើយតបទៅនឹងសំណួរមួយទាក់ទងនឹងថាតើ លោកមានគម្រោងទាក់ទងទៅកាន់ប្រទេសកូរ៉េខាងជើង ឬមេដឹកនាំរបស់ខ្លួនលោក គីម ជុងអ៊ុន នាពេលខាងមុខនេះ។ លោកប្រធានាធិបតីបានលើកឡើងថា៖ «អ្នករាល់គ្នាស្អប់ក្នុងការឮរឿងនោះ ប៉ុន្តែវាសំខាន់ណាស់ក្នុងការ បន្ដទំនាក់ទំនងជាមួយលោក គីម”។
លោក ត្រាំ បានលើកឡើងថា “យើងមានទំនាក់ទំនងដ៏អស្ចារ្យ លោក គីម ជុងអ៊ុន ជាមនុស្សឆ្លាត ខ្ញុំស្គាល់គាត់ច្បាស់ណាស់” លោក ត្រាំ បានក្លាយជាប្រធានាធិបតីអាមេរិកដំបូងគេដែលជួបពិភាក្សាជាមួយមេដឹកនាំកូរ៉េខាងជើង នៅពេលលោកបានជួបលោក គីម នៅប្រទេសសិង្ហបុរីក្នុងឆ្នាំ២០១៨។ លោកបានជួបពិភាក្សាពីរជុំទៀតជាមួយលោក គីម ជុងអ៊ុន នៅឆ្នាំបន្ទាប់ ប៉ុន្តែភាគីទាំងពីរនៅទីបំផុត បានត្រឡប់ទៅផ្ទះវិញដោយដៃទទេ។
នៅក្រោមការគ្រប់គ្រង របស់ប្រធានាធិបតីមុនលោក ចូ បៃដិន សហរដ្ឋអាមេរិក មិនមានវឌ្ឍនភាពជាក់ស្តែងក្នុងការទប់ស្កាត់មហិច្ឆិតាមីស៊ីល និងនុយក្លេអ៊ែររបស់កូរ៉េខាងជើង បើទោះបីជាខ្លួនបានអំពាវនាវឱ្យមានការ សន្ទនារវាងប្រទេសដោយគ្មានលក្ខខណ្ឌជាមុនក៏ដោយ។ ជាមួយនឹងកូរ៉េខាងជើង បង្កើនទំនាក់ទំនងយោធាជាមួយរុស្ស៊ី ចាប់តាំងពីការលុកលុយយ៉ាងពេញទំហឹងមកលើអ៊ុយក្រែន អតីតមន្ត្រីរដ្ឋបាលលោក បៃដិន បានលើកឡើងថា ស្ទើរតែគ្មានការប្រាស្រ័យទាក់ទងដ៏មានអត្ថន័យរវាងទីក្រុងវ៉ាស៊ីនតោន និងទីក្រុងព្យុងយ៉ាង ក្នុងអំឡុងពេលអាណត្តិ ៤ ឆ្នាំរបស់លោក។
ផ្ទុយពីលោក ត្រាំ កូរ៉េខាងជើង មិនបានបង្ហាញការចាប់អារម្មណ៍ខ្លាំងណាមួយ ក្នុងការឈានទៅរកសហរដ្ឋអាមេរិកនោះទេ។ មានការរំពឹងទុកថា ក្នុងអំឡុងពេលអាណត្តិប្រធានាធិបតីទីពីររបស់លោក លោក ត្រាំ នឹងស្វែងរកការចរចាឡើងវិញជាមួយលោក គីម ដោយមិនស្វែងរកការរុះរើទាំងស្រុងនៃឃ្លាំងអាវុធនុយក្លេអ៊ែរ របស់កូរ៉េខាងជើងទៀតនោះទេ៕
ប្រែសម្រួល ឈូក បូរ៉ា
