បរទេស៖ យោងតាមការចេញផ្សាយរបស់ RT អ្នកការទូតកំពូលរបស់ទីក្រុងប៉េកាំងបាននិយាយក្នុងអំឡុងកិច្ចប្រជុំជាមួយប្រធានាaធិបតីរុស្ស៊ីលោក Vladimir Putin កាលពីថ្ងៃអង្គារថា ភាពជាដៃគូជិតស្និទ្ធរវាងរុស្ស៊ី និងចិនមិនបង្កការគំរាមកំហែងដល់ប្រជាជាតិដទៃ និងមិនអាចរងឥទ្ធិពលពីកម្លាំងខាងក្រៅនោះដែរ។
រដ្ឋមន្ត្រីការបរទេសចិន លោក Wang Yi បានសង្កត់ធ្ងន់ថា ប្រទេសទាំងពីរគ្រាន់តែស្វែងរក ផលប្រយោជន៍រយៈពេលវែងឲ្យគ្នាទៅវិញទៅមកប៉ុណ្ណោះ។
ការលើកឡើងនេះទំនងជាដើម្បីឆ្លើយតបទៅនឹងរបាយការណ៍វាយតម្លៃការគំរាមកំហែងប្រចាំឆ្នាំដោយទីភ្នាក់ងារស៊ើបការណ៍សម្ងាត់អាមេរិកបានអះអាងកាលពីសប្តាហ៍មុនថាទំនាក់ទំនងរវាងទីក្រុងមូស្គូ និងទីក្រុងប៉េកាំងបានជួយ លើកកម្ពស់ការទប់ទល់ជាសកលចំពោះសហរដ្ឋអាមេរិក។
លោក Wang បាននិយាយថា៖ទំនាក់ទំនងចិន-រុស្ស៊ី បានប្រកាន់ខ្ជាប់នូវការមិនចូលបក្សសម្ព័ន្ធ ការមិនប្រឈមមុខគ្នា និងការមិនកំណត់គោលដៅរបស់ភាគីទីបី។ ពួកគេក៏មិនបង្កការគំរាមកំហែងដល់ប្រទេសណាមួយក្នុងពិភពលោក ហើយក៏មិនស្ថិតនៅក្រោមការជ្រៀតជ្រែក និងឥទ្ធិពលពីភាគីទីបីណាមួយដែរ។
គួរឲ្យដឹងដែរថាលោក Wang បានមកដល់ទីក្រុងមូស្គូកាលពីថ្ងៃអាទិត្យសម្រាប់ដំណើរទស្សនកិច្ចរយៈពេលបីថ្ងៃតាមការអញ្ជើញរបស់រដ្ឋមន្ត្រីការបរទេសរុស្ស៊ីលោក Sergey Lavrovហើយក្នុងនោះ របៀបវារៈរួមមានទំនាក់ទំនងទ្វេភាគី និងបញ្ហាសកល ជាពិសេសជម្លោះអ៊ុយក្រែនផង៕
ប្រែសម្រួល៖ ស៊ុនលី
