សេអ៊ូល៖ ក្រសួងការពារជាតិ របស់ចក្រភពអង់គ្លេស បានឲ្យដឹងថា ទាហានកូរ៉េខាងជើង បានទទួលរងរបួសជាង ៥,០០០នាក់ ខណៈពេលកំពុងប្រយុទ្ធជាមួយកងកម្លាំងអ៊ុយក្រែន នៅក្នុងតំបន់ជួរមុខ ភាគខាងលិចនៃទីក្រុង Kursk របស់រុស្ស៊ី នេះបើយោងតាមការចុះផ្សាយ របស់ទីភ្នាក់ងារសារព័ត៌មានយុនហាប់។
តួលេខអ្នកស្លាប់មានចំនួនជិតពាក់កណ្តាល នៃចំនួនទាហានដំបូងចំនួន ១១,០០០ នាក់ដែលកូរ៉េខាងជើងបានបញ្ជូន ទៅប្រទេសរុស្ស៊ីកាលពីឆ្នាំមុន ដើម្បីគាំទ្រដល់សង្រ្គាមរបស់ខ្លួនប្រឆាំងនឹងអ៊ុយក្រែន។ ក្រសួងបានឲ្យដឹង ដោយប្រើអក្សរកាត់នៃឈ្មោះផ្លូវការរបស់កូរ៉េខាងជើងថា “អត្រាអ្នកស្លាប់និងរបួសរបស់ទាហានកូរ៉េខាងជើង ជាចម្បងនោះគឺ តាមរយៈការវាយលុកដ៏ច្រើនសន្ធឹកសន្ធាប់” ។
ប្រភពបានកត់សម្គាល់ឃើញថា កងកម្លាំងកូរ៉េខាងជើង និងរុស្ស៊ី បានបង្កើនទឹកដីនៅតំបន់ Kursk ក្នុងប៉ុន្មានសប្តាហ៍ថ្មីៗនេះ ដោយបន្ថែមថា ប្រតិបត្តិការរបស់កូរ៉េខាងជើង ត្រូវបានបង្ខាំងនៅក្នុងតំបន់ ហើយការសម្រេចចិត្តណាមួយ ដើម្បីដាក់ពង្រាយទៅកាន់ទឹកដីអ៊ុយក្រែន នឹងតម្រូវឱ្យមានការចុះហត្ថលេខាពីមេដឹកនាំកូរ៉េខាងជើងលោក គីម ជុងអ៊ុន និងប្រធានាធិបតីរុស្ស៊ីលោក វ្លាឌីមៀ ពូទីន ។
កាលពីសប្តាហ៍មុន យោធាកូរ៉េខាងត្បូងបានឲ្យដឹងថា កូរ៉េខាងជើងត្រូវបានគេប៉ាន់ប្រមាណ ថាបានទ្រទ្រង់ទាហានចំនួន ១១,០០០ នាក់ដែលត្រូវបានបញ្ជូនកាលពីឆ្នាំមុន ដោយបន្ថែមថាកូរ៉េខាងជើង ហាក់ដូចជាបានបញ្ជូនទាហាន ៣,០០០ បន្ថែមទៀតទៅកាន់ប្រទេសរុស្ស៊ីនៅក្នុងខែមករា និងខែកុម្ភៈ៕
ប្រែសម្រួល ឈូក បូរ៉ា
