សេអ៊ូល៖ អ្នកសង្កេតការណ៍ ឧស្សាហកម្មបានកត់សម្គាល់ថា ផែនការរបស់សហរដ្ឋអាមេរិក ក្នុងការដាក់ពន្ធ ២៥ ភាគរយលើរថយន្តដែលនាំចូលចាប់ពីសប្តាហ៍នេះ បានបញ្ឆេះការព្រួយបារម្ភអំពីស្ថិរភាព រយៈពេលវែងរបស់ក្រុមហ៊ុន GM Korea Co., ដែលជាអង្គភាពកូរ៉េខាងត្បូងនៃក្រុមហ៊ុន General Motors (GM) Co. ដែលបង្កើនលទ្ធភាពនៃការដកខ្លួនចេញពីប្រទេសកូរ៉េខាងត្បូង។
ទីស្នាក់ការកណ្តាលរបស់ GM បានបង្ហាញថា ខ្លួនកំពុងតាមដានយ៉ាងដិតដល់នូវការអភិវឌ្ឍន៍ពន្ធដារ ហើយអាចពិចារណាជម្រើស ដូចជាការផ្លាស់ប្តូរទីតាំងផលិតកម្ម ប្រសិនបើឧបសគ្គពាណិជ្ជកម្ម របស់សហរដ្ឋអាមេរិក នៅតែបន្តកើតមាន។ ប្រវត្តិរបស់ក្រុមហ៊ុននៃការចាកចេញពីទីផ្សារជាមួយនឹងការកើនឡើងថ្លៃដើម រួមទាំងអូស្ត្រាលី ឥណ្ឌូនេស៊ី ថៃ និងឥណ្ឌា បានជំរុញឱ្យអ្នកសង្កេតការណ៍ឧស្សាហកម្មយកចិត្តទុកដាក់លើសូចនាករបែបនេះ។
ក្រុមហ៊ុន GM Korea ត្រូវបានបង្កើតឡើងក្នុងឆ្នាំ ២០០២ នៅពេលដែលក្រុមហ៊ុនផលិតរថយន្ត របស់សហរដ្ឋអាមេរិក បានទិញភាគហ៊ុនភាគច្រើននៅក្នុងក្រុមហ៊ុន Daewoo Motor ដែលមានបញ្ហាហើយបានចាប់ផ្តើមក្រុមហ៊ុនផលិតរថយន្តថ្មីមួយគឺ GM Daewoo Auto & Technology ។ វាត្រូវបានប្តូរឈ្មោះទៅជា GM Korea ក្នុងឆ្នាំ២០១១។
ក្រុមហ៊ុននេះមានរោងចក្រចំនួនពីរនៅ Incheon ភាគខាងលិចទីក្រុងសេអ៊ូល និង Changwon ចម្ងាយប្រហែល ៣០០ គីឡូម៉ែត្រភាគអាគ្នេយ៍នៃរដ្ឋធានី ព្រមទាំងក្រុមហ៊ុនបុត្រសម្ព័ន្ធស្រាវជ្រាវ និងអភិវឌ្ឍន៍ ដែលរួមគ្នាផ្តល់ការងារដល់កម្មករប្រហែល ១១,០០០នាក់ ៕
ប្រែសម្រួល ឈូក បូរ៉ា
