តូក្យូ៖ ប្រទេសចិន បានឲ្យដឹងថា ខ្លួនបានចាប់ផ្តើមសមយុទ្ធយោធា ទ្រង់ទ្រាយធំនៅជុំវិញកោះតៃវ៉ាន់ ដែលបម្រើជាការ ព្រមានយ៉ាងម៉ឺងម៉ាត់ និងការរារាំងដោយបង្ខំ ប្រឆាំងនឹងអ្នកដែលស្វែងរកឯករាជ្យ ភាពរបស់កោះនេះ ដោយបង្កើន ភាពតានតឹង និងបានថ្កោលទោស មេដឹកនាំរបស់ខ្លួនលោក Lai Ching-te ចំពោះការបង្កហេតុ ។
បញ្ជាការរោងមហោស្រពភាគខាងកើតរបស់យោធាចិន ដែលគ្របដណ្តប់លើច្រកសមុទ្រតៃវ៉ាន់ បានឲ្យដឹងថា ខ្លួនបានរៀបចំកងកម្លាំងទ័ពជើងទឹក ជើងអាកាស និងគ្រាប់រ៉ុក្កែត ដើម្បីបិទកោះនេះពីទិសដៅជាច្រើន។ សមយុទ្ធនេះផ្តោតជាសំខាន់លើការបិទតំបន់សំខាន់ៗ និងផ្លូវសមុទ្រ សម្រេចបាននូវឧត្តមភាពដ៏ទូលំទូលាយ និងការបើកការវាយប្រហារលើគោលដៅដែនសមុទ្រ និងដីគោក។
បញ្ជាការបានឲ្យដឹងថា សមយុទ្ធនេះគឺជា “សកម្មភាពស្របច្បាប់ និងចាំបាច់ ដើម្បីការពារអធិបតេយ្យភាព និងឯកភាពជាតិរបស់ប្រទេសចិន”។ ការិយាល័យកិច្ចការ តៃវ៉ាន់របស់ចិន ក៏បានឲ្យដឹងផងដែរថា សមយុទ្ធនេះគឺជា “ការដាក់ទណ្ឌកម្មយ៉ាងម៉ឺងម៉ាត់” សម្រាប់រដ្ឋាភិបាលលោក Lai ដែលទីក្រុងប៉េកាំង បានថ្កោលទោសថាជាអ្នកបំបែកខ្លួន។
លោក Lai បានសន្យាកាលពីខែមុនថា នឹងដាក់ឱ្យដំណើរការឡើងវិញ នូវប្រព័ន្ធតុលាការយោធា របស់កោះនេះ ដើម្បីការពារការជ្រៀតចូល និងសកម្មភាពចារកម្ម របស់ទីក្រុងប៉េកាំង ប្រឆាំងនឹងកងកម្លាំងប្រដាប់អាវុធរបស់តៃវ៉ាន់។ នៅពេលនោះ លោកប្រធានាធិបតីរូបនេះ បានចាត់ថ្នាក់ដីគោកថាជា «កម្លាំងអរិភាពបរទេស»។
វីដេអូមួយដែលត្រូវ បានចេញផ្សាយ ដោយបញ្ជាការបង្ហាញពីនាវា របស់ចិន ដែលកំពុងបើកក្នុងសមុទ្រ យន្តហោះចម្បាំង បានហោះឡើង និងកាំជ្រួចមួយត្រូវបានដាក់ចូល ទៅក្នុងទីតាំងបាញ់បង្ហោះ។ លោកស្រី Zhu Fenglian អ្នកនាំពាក្យការិយាល័យតៃវ៉ាន់ របស់ប្រទេសចិន បានរិះគន់លោក Lai សម្រាប់ “ការដាក់ស្លាកដីគោកដោយចំហរថាជា “កម្លាំងខាងក្រៅ ដែលមានអរិភាព” និងញុះញង់ឱ្យមានការប្រឆាំងនឹងទីក្រុងប៉េកាំង។ លោកស្រីបានបន្ដថា ឯករាជ្យភាព របស់តៃវ៉ាន់ “មានន័យថាសង្រ្គាម” ហើយការបន្តវាមានន័យថា “រុញប្រជាជនតៃវ៉ាន់ឱ្យស្ថិត ក្នុងស្ថានភាពដ៏គ្រោះថ្នាក់”។
ក្រសួងការពារជាតិតៃវ៉ាន់បានឲ្យដឹងថា ការបង្កើតកងទ័ពជើងទឹក ដែលដឹកនាំដោយនាវាផ្ទុកយន្តហោះចិន Shandong បានចូលទៅក្នុងតំបន់ឆ្លើយតប របស់កោះនេះកាលពីថ្ងៃចន្ទ ដោយជំរុញឱ្យមានការបញ្ជូនយន្តហោះចម្បាំង និងនាវាដើម្បីត្រួតពិនិត្យ សកម្មភាពយោធាដីគោក ខណៈដែលប្រព័ន្ធមីស៊ីល ក៏ត្រូវបានធ្វើឱ្យសកម្មផងដែរ៕
ប្រែសម្រួល ឈូក បូរ៉ា
