វ៉ាស៊ីនតោន៖ ចំពេលមានការប្រឆាំង រីករាលដាល ប្រធានាធិបតី សហរដ្ឋអាមេរិកលោក ដូណាល់ ត្រាំ បានចុះហត្ថលេខាលើបទ បញ្ជាប្រតិបត្តិលើអ្វី ដែលគេហៅថា ពន្ធគយ ដោយដាក់ពន្ធមូលដ្ឋានអប្បបរមា ១០ភាគរយ និងអត្រាខ្ពស់លើដៃគូពាណិជ្ជកម្ម របស់ខ្លួនមួយចំនួន នេះបើយោងតាមការចុះផ្សាយ របស់ទីភ្នាក់ងារសារ ព័ត៌មានចិនស៊ិនហួ។
បទបញ្ជាប្រតិបត្តិ បានឲ្យដឹងថា ការនាំចូលទាំងអស់នឹងត្រូវដាក់ពន្ធបន្ថែម ១០ ភាគរយ លើកលែងតែមាន ការផ្តល់ជូនផ្សេងពីនេះប៉ុណ្ណោះ។ វានឹងចូលជាធរមាននៅថ្ងៃទី ៥ ខែមេសា។ យោងតាមឯកសារសេតវិមានបានឱ្យដឹងថា លោក ត្រាំ នឹងដាក់ “ពន្ធខ្ពស់ទៅវិញ ទៅមកជា” លើប្រទេស និងតំបន់ដែលសហរដ្ឋអាមេរិក “មានឱនភាពពាណិជ្ជកម្ម ធំបំផុត” ហើយវានឹងចូលជាធរមាននៅថ្ងៃទី ៩ ខែមេសា។
សេតវិមានបានកត់សម្គាល់ថា ទំនិញមួយចំនួននឹងមិនជាប់ពន្ធគយ រួមទាំងដែកថែប និងអាលុយមីញ៉ូម ក៏ដូចជារថយន្ត និងគ្រឿងបន្លាស់រថយន្ត ក៏ដូចជាទង់ដែង ឱសថ គ្រឿងអេឡិចត្រូនិក និងឈើ ដែលស្ថិតនៅក្រោមពន្ធផ្នែកទី ២៣២ ។
សម្រាប់ប្រទេសកាណាដា និងម៉ិកស៊ិក ទំនិញអនុលោមតាមកិច្ចព្រមព្រៀង សហរដ្ឋអាមេរិក-ម៉ិកស៊ិក-កាណាដា (USMCA) នឹងបន្តឃើញពន្ធ 0 ភាគរយ ទំនិញ ដែលមិន អនុលោមតាម USMCA នឹងឃើញពន្ធ ២៥ ភាគរយ ហើយថាមពល ដែលមិនអនុលោមតាម USMCA និងប៉ូតាស្យូមនឹងឃើញពន្ធ ១០ ភាគរយ នេះបើយោង តាមសេតវិមាន។
នៅក្នុងសុន្ទរកថា របស់លោកនៅឯសេតវិមាន Rose Garden លោក ត្រាំ បានបង្ហាញតារាងស្តីពី “ពន្ធទៅវិញទៅមក” ។ តារាងបង្ហាញថាប្រទេស និង តំបន់ផ្សេងៗ គ្នាប្រឈមនឹងអត្រាពន្ធផ្សេងៗគ្នា ។ ឧទាហរណ៍ ប្រទេសចិននឹងប្រឈម មុខនឹងពន្ធ ៣៤ ភាគរយ សហភាពអឺរ៉ុប ២០ ភាគរយ វៀតណាម ៤៦ ភាគរយ ជប៉ុន ២៤ ភាគរយ ឥណ្ឌា ២៦ ភាគរយ កូរ៉េខាងត្បូង ២៥ ភាគរយ ថៃ ៣៦ ភាគរយ ស្វីស ៣១ ភាគរយ ឥណ្ឌូនេស៊ី ៣២ ភាគរយ ម៉ាឡេស៊ី ២៤ ភាគរយ និងកម្ពុជា ៤៩ ភាគរយ៕
ប្រែសម្រួល ឈូក បូរ៉ា
