បរទេស៖ រូបភាពពីផ្កាយរណបដែលត្រូវបាន វិភាគកាលពីថ្ងៃពុធដោយសារព័ត៌មាន Associated Press គឺបានបង្ហាញពីការដាក់ពង្រាយយន្តហោះទម្លាក់គ្រាប់បែក B-2 Spirit យ៉ាងតិចប្រាំមួយគ្រឿង ដែលមានសមត្ថភាពនុយក្លេអ៊ែរទៅកាន់ ឆ្នេរ Camp Thunder Bay នៅលើកោះ Diego Garcia ក្នុងមហាសមុទ្រឥណ្ឌា។
យោងតាមសារព័ត៌មាន AP ចេញផ្សាយនៅថ្ងៃទី៣ ខែមេសា ឆ្នាំ២០២៥ បានឱ្យដឹងថា វត្តមានរបស់យន្តហោះទម្លាក់គ្រាប់ B-2 Spirit នេះ កើតឡើងខណៈដែលសហរដ្ឋអាមេរិកបន្តយុទ្ធនាការ វាយប្រហារផ្លូវអាកាសដ៏ខ្លាំងមួយសំដៅលើក្រុមឧទ្ទាម Houthi របស់យេម៉ែន។ B-2 ត្រូវបានគេប្រើក្នុងការប្រយុទ្ធដើម្បី កំណត់គោលដៅលើក្រុមឧទ្ទាម ហ៊ូធី ក្នុងពេលកន្លងមក។
មូលដ្ឋាន Diego Garcia ស្ថិតនៅភាគខាងត្បូងនៃប្រទេសឥណ្ឌា និងក្នុងចម្ងាយដ៏គួរឱ្យចាប់អារម្មណ៍ទាំងអ៊ីរ៉ង់ និងយេម៉ែន។ ភាពតានតឹងនៅតែមានកម្រិតខ្ពស់រវាងអ៊ីរ៉ង់ និងអាមេរិក ជុំវិញកម្មវិធីនុយក្លេអ៊ែរដែលរីកចម្រើន យ៉ាងឆាប់រហ័សរបស់ក្រុងតេហេរ៉ង់។ យន្តហោះទម្លាក់គ្រាប់បែក B-2 នឹងមានសារៈសំខាន់ក្នុងការទម្លាក់គ្រាប់បែក លើទីតាំងនុយក្លេអ៊ែរក្រោមដីរបស់អ៊ីរ៉ង់។
នេះជាការក្រឡេកមើលការដាក់ពង្រាយ B-2 – និងភាពតានតឹងក្នុងតំបន់កាន់តែទូលំទូលាយ នៅមជ្ឈិមបូព៌ាចំពេលមានសង្រ្គាមអ៊ីស្រាអែល-ហាម៉ាសនៅហ្គាហ្សាស្ទ្រីប ៕
ប្រែសម្រួលៈ ណៃ តុលា
