ប៉េកាំង៖ ពិភពលោកកំពុងខិតជិតដល់ពេលវេលាដ៏ឈឺចាប់ ខណៈដែលអ្វីដែលហៅថា “ពន្ធគយទៅវិញទៅមក” របស់រដ្ឋបាលសហរដ្ឋអាមេរិក មកដល់។ វាគឺជាការពិតដែលមិនអាចប្រកែកបានដែលថាសហរដ្ឋអាមេរិក កំពុងកាន់កាប់អនុត្តរភាពដោយមិនខ្មាសអៀនក្នុងការប៉ុនប៉ងដើម្បីទទួលបានផលប្រយោជន៍របស់ខ្លួន ប៉ុន្តែវិធានការទាំងនេះអាចបញ្ចប់ដោយការសងសឹងតបវិញ។
សម្រាប់ដៃគូពាណិជ្ជកម្មសំខាន់ៗរបស់ខ្លួន ការសាទររបស់សហរដ្ឋអាមេរិក ចំពោះពន្ធដារគឺគ្មានអ្វីថ្មីទេ។ ភ័ស្តុតាងចុងក្រោយបង្អស់បានបង្ហាញថា រដ្ឋបាលសហរដ្ឋអាមេរិកនឹងដាក់ “ពន្ធមូលដ្ឋានអប្បបរមា” ១០ ភាគរយ និងអត្រាខ្ពស់ជាងនេះលើដៃគូពាណិជ្ជកម្មរបស់ខ្លួនមួយចំនួន។
ក្នុងកម្រិតមួយចំនួន ការអនុវត្តការគំរាមកំហែងដ៏ខ្លាំងរបស់ទីក្រុងវ៉ាស៊ីនតោន បង្ហាញពីភាពរកាំរកូស និងការថប់បារម្ភកាន់តែខ្លាំងឡើងរបស់រដ្ឋបាលសហរដ្ឋអាមេរិក ទាក់ទងនឹងការរក្សាតំណែងឧត្តមភាពរបស់ខ្លួននៅក្នុងពិភពសកលភាវូបនីយកម្មដែលកាន់តែខ្លាំងឡើង។
ទោះជាយ៉ាងណាក៏ដោយ វាជារឿងគួរឱ្យអស់សំណើចដែលសហរដ្ឋអាមេរិកជ្រើសរើសសម្រាប់ការការពារនិយម ជំនួសឱ្យការទទួលយកនិន្នាការនៃសម័យកាល។ ការលេង “កាតពន្ធ” គឺជាល្បែងចាញ់ ដែលធ្វើបាបសហរដ្ឋអាមេរិកខ្លួនឯងផងដែរ។
ប្រសិនបើរដ្ឋបាលសហរដ្ឋអាមេរិក ធ្វើតាមផែនការពន្ធរបស់ខ្លួន វានឹងបង្កើនបន្ថែមទៀតនូវអ្វីដែលជាកម្រិតពន្ធខ្ពស់បំផុតរបស់ប្រទេសរួចទៅហើយក្នុងរយៈពេលជាច្រើនទសវត្សរ៍កន្លងមកនេះ។
សេដ្ឋវិទូអាមេរិកនាំមុខគេបានព្រមានអំពីការចំណាយខ្ពស់ក្នុងការអនុវត្ត និងបានសម្តែងការព្រួយបារម្ភជារួមអំពីផលវិបាកធ្ងន់ធ្ងរ ដូចជាតម្លៃអ្នកប្រើប្រាស់កើនឡើង អតិផរណា ការកើនឡើងនៃភាពអត់ការងារធ្វើ និងសូម្បីតែវិបត្តិសេដ្ឋកិច្ច។
យោងតាមការសិក្សារបស់សាកលវិទ្យាល័យ Yale ពន្ធគយនឹងធ្វើឱ្យសហរដ្ឋអាមេរិកកើនឡើងនូវកម្រិតតម្លៃ ២.១ភាគរយ ប្រសិនបើប្រទេសផ្សេងទៀតជ្រើសរើសសងសឹក។ នេះគឺស្មើនឹងការខាតបង់ពី ២,៧០០ ទៅ ៣,៤០០ ដុល្លារអាមេរិកក្នុងមួយគ្រួសារជាមធ្យម។ ទន្ទឹមនឹងនេះ កំណើនសេដ្ឋកិច្ចរបស់សហរដ្ឋអាមេរិកទាំងមូលនឹងធ្លាក់ចុះ ១ ភាគរយនៅឆ្នាំ២០២៥៕
ប្រែសម្រួល ឈូក បូរ៉ា
