តូក្យូ៖ នាយករដ្ឋមន្ត្រីជប៉ុន លោក Shigeru Ishiba បានឲ្យដឹងថា ពន្ធគយដែលដាក់លើទំនិញជប៉ុន ដោយរដ្ឋបាលសហរដ្ឋអាមេរិក គឺជា “វិបត្តិជាតិ” នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ ។
ថ្លែងនៅក្នុងសម័យប្រជុំសភា លោក Ishiba បានឲ្យដឹងថា ការយកពន្ធ ២៤ ភាគរយលើការនាំចូលរបស់ជប៉ុន “អាចហៅថាវិបត្តិជាតិ ហើយរដ្ឋាភិបាល កំពុងប្រឹងប្រែងអស់ពីសមត្ថភាពជាមួយគ្រប់ភាគីទាំងអស់”។
កាលពីថ្ងៃព្រហស្បតិ៍លោក Ishiba បានប្រាប់អ្នកយកព័ត៌មានថា ការប្រកាសរបស់ប្រធានាធិបតីអាមេរិកលោក ដូណាល់ ត្រាំ ក្នុងការដាក់ “ពន្ធទៅវិញទៅមក” គឺជាការសោកស្ដាយ និងខកចិត្តយ៉ាងខ្លាំង បើទោះបីជាមានការអំពាវនាវពីទីក្រុងតូក្យូ ក្នុងកម្រិតផ្សេងៗមិនឱ្យចាត់វិធានការឯកតោភាគីក៏ដោយ។
លោកនាយករដ្ឋមន្ត្រីបានអះអាងថា ប្រទេសដែលផ្តោតលើការនាំចេញរបស់លោកគឺជាអ្នកវិនិយោគធំជាងគេលើពិភពលោកនៅសហរដ្ឋអាមេរិកចាប់តាំងពីឆ្នាំ២០១៩ ដោយកត់សម្គាល់ក្រុមហ៊ុនផលិតរថយន្តជប៉ុន បានវិនិយោគផ្ទាល់មានតម្លៃប្រហែល ៤១៨ លានដុល្លារអាមេរិក និងបានបង្កើតការងារចំនួន ២.៣ លាននាក់នៅសហរដ្ឋអាមេរិក។
លោក Ishiba បានលើកឡើងថា ការដំឡើងពន្ធរបស់សហរដ្ឋអាមេរិកនឹងមានឥទ្ធិពលយ៉ាងសំខាន់ មិនត្រឹមតែលើទំនាក់ទំនងសេដ្ឋកិច្ចទ្វេភាគីប៉ុណ្ណោះទេ ប៉ុន្តែថែមទាំងលើសេដ្ឋកិច្ចពិភពលោក និងប្រព័ន្ធពាណិជ្ជកម្មពហុភាគីផងដែរ៕
ប្រែសម្រួល ឈូក បូរ៉ា
