បរទេស៖ អគ្គលេខាធិកាវៀតណាម លោក To Lam បានសន្ទនាតាមទូរស័ព្ទ ជាមួយប្រធានាធិបតីអាមេរិកលោក Donald Trump ដោយនិយាយថា លោកបានត្រៀមខ្លួន រួចជាស្រេច ក្នុងការចរចាជាមួយ សហរដ្ឋអាមេរិក ដើម្បីកាត់បន្ថយ ពន្ធនាំចូលមកត្រឹម 0% លើទំនិញនាំចូល ពីអាមេរិក ហើយស្នើឱ្យ សហរដ្ឋអាមេរិក អនុវត្តអត្រាពន្ធស្រដៀងគ្នា លើទំនិញនាំចូលពីវៀតណាម។
យោងតាមសារព័ត៌មាន VN EXPRESS ចេញផ្សាយ កាលពីថ្ងៃទី៤ ខែមេសា ឆ្នាំ២០២៥ បានឱ្យដឹងថា ចូលរួមក្នុងការ សន្ទនាតាមទូរស័ព្ទពីទីស្នាក់ការគណៈកម្មាធិការមជ្ឈិមបក្ស នាល្ងាចថ្ងៃទី ៤ មេសា ក៏រួមមាននាយករដ្ឋមន្ត្រី Pham Minh Chinh, ប្រធានការិយាល័យគណៈកម្មាធិការមជ្ឈិមបក្ស លោក Le Hoai Trung និងឧបនាយករដ្ឋមន្ត្រី Ho Duc Phoc ផងដែរ។
អគ្គលេខាធិកា To Lam បានវាយតម្លៃខ្ពស់ ចំពោះការផ្លាស់ប្តូរនេះ ដែលមេដឹកនាំទាំងពីរ បានអះអាងនូវបំណង ចង់បន្តពង្រឹងកិច្ចសហប្រតិបត្តិការទ្វេភាគី ដើម្បីផលប្រយោជន៍នៃប្រទេសទាំងពីរ និងរួមចំណែកដល់សន្តិភាព ស្ថិរភាព និងការអភិវឌ្ឍន៍ ក្នុងតំបន់ និងពិភពលោក ។ មេដឹកនាំទាំងពីរ ក៏បានវាយតម្លៃថា ទំនាក់ទំនងទ្វេភាគីកំពុង អភិវឌ្ឍយ៉ាងល្អ លើគ្រប់វិស័យ នេះបើយោងតាមក្រសួង ការបរទេស។
ទាក់ទងនឹងទំនាក់ទំនងពាណិជ្ជកម្មទ្វេភាគី មេដឹកនាំទាំងពីរ បានពិភាក្សាអំពីវិធានការ បន្តជំរុញពាណិជ្ជកម្ម។ អគ្គលេខាធិកា To Lam បានបញ្ជាក់ថា វៀតណាមបានត្រៀម ខ្លួនរួចជាស្រេចក្នុងការចរចាជាមួយអាមេរិក ដើម្បីកាត់បន្ថយពន្ធ នាំចូលមកត្រឹម 0% សម្រាប់ ទំនិញនាំចូលពីអាមេរិក ហើយទន្ទឹមនឹងនោះបានស្នើឱ្យ អាមេរិកអនុវត្តពន្ធដូចគ្នា ចំពោះទំនិញនាំចូលពីវៀតណាម ៕
