វ៉ាស៊ីនតោន៖ ក្រសួងការបរទេសបានឲ្យដឹងថា សហរដ្ឋអាមេរិកបានអះអាងជាថ្មីនូវការប្តេជ្ញាចិត្តរបស់ខ្លួនកាលពីថ្ងៃសុក្រ ក្នុងការធ្វើការជាមួយប្រធានាធិបតីស្តីទីកូរ៉េខាងត្បូង លោក Han Duck-soo ដើម្បីស្ថិរភាពនៅក្នុងសម្ព័ន្ធភាពទ្វេភាគី រហូតដល់អ្នកស្នងតំណែងពីប្រធានាធិបតី Yoon Suk Yeol ត្រូវបានជ្រើសរើសជាផ្លូវការ។
តុលាការធម្មនុញ្ញកូរ៉េបានប្រកាសជាឯកច្ឆ័ន្ទលើការចោទប្រកាន់លោក Yoon នៅថ្ងៃសុក្រ (ម៉ោងនៅប្រទេសកូរ៉េ) ដោយដកលោកចេញពីតំណែងជុំវិញការដាក់ច្បាប់អាជ្ញាសឹករយៈពេលខ្លីរបស់លោលកាលពីក្នុងខែធ្នូ ឆ្នាំមុន និងកំណត់ដំណាក់កាល សម្រាប់ការបោះឆ្នោតប្រធានាធិបតីដែលទំនងជានៅក្នុងខែមិថុនា។
អ្នកនាំពាក្យក្រសួងការបរទេសបានឲ្យដឹងនៅក្នុងការឆ្លើយតបទៅនឹងសំណួររបស់ទីភ្នាក់ងារសារព័ត៌មានយ៉ុនហាប់ថា “សហរដ្ឋអាមេរិកប្តេជ្ញាធ្វើការជាមួយប្រធានាធិបតីស្តីទី និងនាយករដ្ឋមន្រ្តីលោល Han Duck-soo និងរដ្ឋាភិបាលកូរ៉េខាងត្បូង ដើម្បីធានាស្ថិរភាព និងការបន្តនៅក្នុងសម្ព័ន្ធភាពសហរដ្ឋអាមេរិក-កូរ៉េខាងត្បូង រហូតដល់ប្រធានាធិបតីថ្មីត្រូវបានជ្រើសរើស” ។
មន្ត្រីរូបនេះបានបន្ថែមថា “សហរដ្ឋអាមេរិកទន្ទឹងរង់ចាំអនាគតនៃកិច្ចសហប្រតិបត្តិការជិតស្និទ្ធ ដែលនាំមកនូវសន្តិសុខ និងភាពរុងរឿងដល់ប្រជាជាតិយើងទាំងពីរ” នេះបើយោងតាមការចុះផ្សាយរបស់ទីភ្នាក់ងារសារព័ត៌មានយុនហាប់។
អ្នកនាំពាក្យរូបនេះក៏បានបញ្ជាក់ជាថ្មីពីភាពរឹងមាំនៃសម្ព័ន្ធភាពប្រទេសទាំងពីរនិងសហរដ្ឋអាមេរិក។ ការប្តេជ្ញាចិត្តយ៉ាងរឹងមាំ ចំពោះការការពារប្រទេសកូរ៉េខាងត្បូង៕
ប្រែសម្រួល ឈូក បូរ៉ា
