គោលនយោបាយពន្ធដាររបស់អាមេរិក ធ្វើឱ្យមានការមិនពេញចិត្ដពីអ្នកប្រើប្រាស់ និងអាជីវកម្មខ្នាតតូច

ញូវយ៉ក៖ ការសម្រេចចិត្តរបស់ប្រធានាធិបតីអាមេរិកលោក ដូណាល់ ត្រាំ ក្នុងការដាក់ “ពន្ធមូលដ្ឋានអប្បបរមា” ១០ភាគរយ និងអត្រាខ្ពស់លើដៃគូពាណិជ្ជកម្មមួយចំនួន កំពុងធ្វើឱ្យមានការខកចិត្តក្នុងចំណោមប្រជាជនអាមេរិក និងការគំរាមកំហែងដល់ការប្រើប្រាស់ និងអាជីវកម្មខ្នាតតូច ដែលជាមូលដ្ឋានគ្រឹះនៃសេដ្ឋកិច្ចសហរដ្ឋអាមេរិក។

លោក Oriana Smith ដែលកំពុងដើរទិញឥវ៉ាន់នៅហាង Lululemon ក្នុងទីក្រុងញូវយ៉ក កាលពីថ្ងៃពុធ ខណៈពេលដែលលោក ត្រាំ ប្រកាសដាក់ពន្ធទៅវិញទៅមក បានឲ្យដឹងថា “ខ្ញុំមិនដឹងថាតើពន្ធនឹងធ្វើឱ្យផលិតផលទាំងនេះឡើងថ្លៃទេ ប៉ុន្តែខ្ញុំពិតជាសង្ឃឹមថា នឹងមិនមានបញ្ហាទៅចុះ។

លោក Smith ដែលចូលចិត្តម៉ាកសំលៀកបំពាក់កាណាដាដូចជា Lululemon និង Aritzia បានបន្ថែមថា “ខ្ញុំមិនដឹងថាហេតុអ្វីបានជាយើងខឹងកាណាដានោះទេ។ យើងជាអ្នកជិតខាង យើងជាសម្ព័ន្ធមិត្ត វាចម្លែក ខ្ញុំមិនដឹងថាហេតុអ្វីបានជាយើងខឹងកាណាដា”។

លោកស្រី Jenn Garcia ជាអ្នករស់នៅរដ្ឋ New Jersey ដែលចំណាយពេលភាគច្រើនរបស់លោកស្រី មើលថែក្មេងៗបានឲ្យដឹងថា “ខ្ញុំមិនដឹងច្រើនអំពីសេដ្ឋកិច្ចទេ ប៉ុន្តែវានឹងធ្វើឱ្យរបស់មានតម្លៃថ្លៃជាងមុន” ។

លោកស្រី Garcia បាន​លើកឡើងថា លោកស្រីប្រហែល​ជា​នឹង​ចំណាយ​ប្រាក់​ច្រើន​លើ​ប្រដាប់​ក្មេង​លេង និង​ផលិតផល​ផ្សេង​ទៀត ដែល​ត្រូវ​បាន​នាំ​ចូល។

លោកស្រី Garcia ដែលប្រតិបត្តិការអាជីវកម្មនៅ eBay បានឲ្យដឹងថា “ខ្ញុំមិនដឹងថាហេតុអ្វីបានជាប្រធានាធិបតីធ្វើបែបនេះទេ។ របស់ជាច្រើនរបស់ខ្ញុំនៅលើ eBay ក៏ត្រូវបានផលិតនៅក្នុងប្រទេសចិនផងដែរ។ នេះមិនមែនជារឿងល្អសម្រាប់ខ្ញុំទេ ហើយនឹងធ្វើឱ្យប៉ះពាល់ដល់ការងាររបស់ខ្ញុំ”៕

ប្រែសម្រួល ឈូក បូរ៉ា