បរទេស៖ មហាសេដ្ឋីដែលមានជាងគេបំផុតទាំងបី របស់ពិភពលោកគឺ មហាសេដ្ឋី Elon Musk, Jeff Bezos និង Mark Zuckerberg បានខាតបង់យ៉ាងតិច ២៣ ពាន់លានដុល្លារក្នុងម្នាក់ៗ ក្នុងរយៈពេលត្រឹមតែពីរថ្ងៃបន្ទាប់ពីលោក Trump ប្រកាសគោលនយោបាយពន្ធថ្មីរបស់លោក។
យោងតាមសារព័ត៌មាន VN EXPRESS ចេញផ្សាយនៅថ្ងៃទី៦ ខែមេសា ឆ្នាំ២០២៥ បានឱ្យដឹងថា ប្រធានាធិបតីអាមេរិកលោក Donald Trump បានប្រកាសកាលពីថ្ងៃទី២ ខែមេសាថា លោកនឹងដាក់ពន្ធអប្បបរមា 10% លើការនាំចូលពីប្រទេសទាំងអស់ ។ ក្នុងពេលជាមួយគ្នានេះ លោកបានប្រកាសពន្ធទៅវិញ ទៅមកលើសេដ្ឋកិច្ចចំនួន ១៨០ប្រទេស ដែលប្រទេសមួយចំនួន ពន្ធនឹងឡើង ដល់ 50%។
ព័ត៌មាននេះបានធ្វើឱ្យទីផ្សារភាគហ៊ុនអាមេរិកធ្លាក់ចុះ ដោយសន្ទស្សន៍ Dow Jones, S&P 500 និង Nasdaq ទាំងអស់បានធ្លាក់ចុះច្រើនជាង 5% នៅក្នុងវគ្គចុងក្រោយនៃសប្តាហ៍នេះ។
យោងតាមសន្ទស្សន៍ Billionaires Index របស់ Bloomberg មហាសេដ្ឋីដែលមានជាងគេបំផុតទាំងបីរបស់ពិភពលោកគឺ Elon Musk, Jeff Bezos និង Mark Zuckerberg បានខាតបង់ ៣០,៩ ពាន់លានដុល្លារ ២៣,៤៩ ពាន់លានដុល្លារ និង ២៧,៣៤ ពាន់លានដុល្លារ រៀងគ្នា។ នេះក៏ជាការធ្លាក់ចុះយ៉ាងខ្លាំងបំផុតក្នុងរយៈពេលពីរថ្ងៃ នៃទ្រព្យសកម្មដែលមិនធ្លាប់មាន សម្រាប់ក្រុមអ្នកមានបំផុតទាំង ៥០០រូប នៅលើភពផែនដី។
ក្រុមហ៊ុន Tesla, Amazon និង Meta ធំៗទាំងបី ត្រូវបានរងផលប៉ះពាល់យ៉ាងខ្លាំង ដោយសារតែឧស្សាហកម្មបច្ចេកវិទ្យា ពឹងផ្អែកយ៉ាងខ្លាំងទៅលើការ ផលិតបន្ទះឈីប និងសេវាកម្ម IT ពីប្រទេសចិន ឥណ្ឌា និងតៃវ៉ាន់។ ក្នុងនោះ អាមេរិកនឹងដាក់ពន្ធ ៣២% លើទំនិញពីកោះតៃវ៉ាន់, ២៦% លើឥណ្ឌា និងដំឡើងអត្រាពន្ធសរុបដល់ ៥៤% លើចិន ៕
ប្រែសម្រួលៈ ណៃ តុលា
