បរទេស៖ ក្រុមហ៊ុនផលិត រថយន្ត Jaguar និង Land Rover កំពុងផ្អាកការនាំចេញទៅកាន់សហរដ្ឋអាមេរិក ខណៈដែលឧស្សាហកម្ម រថយន្តដែលកំពុងជួបការលំបាករបស់ចក្រភពអង់គ្លេសនេះ ចាប់ផ្តើមឆ្លើយតប នឹងពន្ធ ២៥ភាគរយ លើការនាំចូលរថយន្ត ដែលដាក់ដោយប្រធានាធិបតី អាមេរិក លោក Donald Trump ។
យោងតាមសារព័ត៌មាន AP ចេញផ្សាយនៅថ្ងៃទី៦ ខែមេសា ឆ្នាំ២០២៥ បានឱ្យដឹងថា Jaguar Land Rover Automotive ដែលជាក្រុមហ៊ុនផលិត រថយន្តដ៏ធំបំផុតមួយ របស់ចក្រភពអង់គ្លេស បាននិយាយកាលពីថ្ងៃសៅរ៍ថា ការផ្អាកនេះនឹងធ្វើឡើងនៅក្នុងខែនេះ។
ក្រុមហ៊ុនបាននិយាយនៅក្នុងសេចក្តីថ្លែងការណ៍មួយថា “សហរដ្ឋអាមេរិកគឺជាទីផ្សារដ៏សំខាន់មួយសម្រាប់ម៉ាកយីហោប្រណីតរបស់ JLR” ។ “នៅពេលយើងធ្វើការ ដើម្បីដោះស្រាយលក្ខខណ្ឌពាណិជ្ជកម្មថ្មី ជាមួយនឹងដៃគូអាជីវកម្ម យើងកំពុងចាត់វិធានការ រយៈពេលខ្លីមួយចំនួន រួមទាំងការផ្អាកការដឹកជញ្ជូននៅក្នុងខែមេសា នៅពេលដែលយើង បង្កើតផែនការរយៈពេលពាក់កណ្តាល ទៅរយៈពេលវែងរបស់យើង”។
ក្រុមអ្នកវិភាគបាននិយាយថា ពួកគេរំពឹងថា ក្រុមហ៊ុនផលិតរថយន្តអង់គ្លេសផ្សេងទៀត នឹងធ្វើតាមខណៈ ដែលពន្ធកើនឡើងបានបង្កើន សម្ពាធលើឧស្សាហកម្មដែលកំពុងតស៊ូជាមួយនឹងការធ្លាក់ចុះ នៃតម្រូវការនៅក្នុងស្រុក និងតម្រូវការដើម្បីផ្លាស់ប្តូររោងចក្រ របស់ពួកគេឡើងវិញ សម្រាប់ការផ្លាស់ប្តូរទៅជារថយន្តអគ្គិសនី ។
សូមជម្រាបថា ចំនួនរថយន្តដែលផលិតនៅចក្រភពអង់គ្លេសបានធ្លាក់ចុះ 13.9% មកនៅត្រឹម 779,584 គ្រឿងកាលពីឆ្នាំមុន នេះបើយោងតាម SMMT ។ ជាង 77% នៃយានជំនិះទាំងនោះមានគោលដៅសម្រាប់ទីផ្សារនាំចេញ។ រោងចក្រនៅចក្រភពអង់គ្លេស នាំចេញរថយន្តដូចជា Qashqai និង Juke របស់ក្រុមហ៊ុន Nissan , BMW Mini និង Toyota Corolla ក៏ដូចជាម៉ូដែល Land Rover និង Jaguar ៕
ប្រែសម្រួលៈ ណៃ តុលា
