បរទេស៖ នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បាននិយាយថា ប្រទេសម៉ាឡេស៊ីនឹងដឹកនាំកិច្ចខិតខំ ប្រឹងប្រែង ដើម្បីសម្របសម្រួលការឆ្លើយតបតំបន់នៅក្នុងតំបន់អាស៊ីអាគ្នេយ៍ ឆ្ពោះទៅរកការយកពន្ធ របស់ប្រធានាធិបតីអាមេរិក លោក ដូណាល់ ត្រាំ។
យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី៧ ខែមេសា ឆ្នាំ២០២៥ បានឱ្យដឹងថា លោក អាន់វ៉ា អ៊ីប្រាហ៊ីម បាននិយាយនៅក្នុងសុន្ទរកថាវីដេអូមួយ ដែលបានបង្ហោះនៅលើបណ្តាញទំនាក់ទំនងសង្គមរបស់លោក រួមទាំង Facebook កាលពីល្ងាចថ្ងៃអាទិត្យថា “ម៉ាឡេស៊ីក្នុងនាមជា ប្រធានអាស៊ាន នឹងដឹកនាំកិច្ចខិតខំប្រឹងប្រែង ដើម្បីបង្ហាញរណសិរ្ស រួមក្នុងតំបន់ រក្សាខ្សែសង្វាក់ផ្គត់ផ្គង់បើកចំហ និងភាពធន់ និងធានាថា សំឡេងរួមរបស់អាស៊ាន ត្រូវបានឮយ៉ាងច្បាស់ និងរឹងមាំនៅលើឆាកអន្តរជាតិ” ។
នៅក្នុងការបង្ហោះដាច់ដោយ ឡែកមួយ លោក អាន់វ៉ា អ៊ីប្រាហ៊ីម បាននិយាយថា លោកមានការហៅទូរស័ព្ទ ជាមួយនាយករដ្ឋមន្ត្រីវៀតណាម ផាម មិញជីញ (Pham Minh Chinh) ស្តីពីការឆ្លើយតបរួមដោយតំបន់។ លោក អាន់វ៉ា បាននិយាយនៅក្នុងការបង្ហោះ Facebook មួយផ្សេងទៀតថា មេដឹកនាំម៉ាឡេស៊ី ក៏បានពិភាក្សាអំពីពន្ធគយ ជាមួយប្រធានាធិបតីឥណ្ឌូនេស៊ី Prabowo Subianto កាលពីល្ងាចថ្ងៃ អាទិត្យផងដែរ។
ប្រទេសនៅក្នុង សមាគមប្រជាជាតិ អាស៊ីអាគ្នេយ៍ ដែលជាក្រុមប្រមូលផ្តុំ នៃបណ្តាប្រទេសចំនួន ១០ ក្នុងតំបន់ ស្ថិតក្នុងចំណោមប្រទេស ដែលរងគ្រោះខ្លាំងបំផុត ដោយពន្ធគយរបស់សហរដ្ឋអាមេរិក ។ ប្រទេសវៀតណាម និងកម្ពុជាត្រូវបានរដ្ឋាភិបាលត្រាំ សម្រេចយកអត្រាពន្ធ ៤៦% និង ៤៩% រៀងខ្លួន ខណៈម៉ាឡេស៊ីទទួលបានអត្រា ២៤%។
ដូចដៃគូក្នុងតំបន់របស់ខ្លួនដែរ ម៉ាឡេស៊ីបានជ្រើសរើស មិនសងសឹកនឹង ការយកពន្ធនេះ ខណៈពេលដែលកំពុងស្វែង រកការចូលរួម ប៉ុន្តែបានបដិសេធការអះអាង របស់រដ្ឋបាល Trump ដែលថាខ្លួនដាក់ពន្ធ 47% លើទំនិញអាមេរិក៕
ប្រែសម្រួលៈ ណៃ តុលា
