តេអេរ៉ង់៖ ប្រធានាធិបតីអ៊ីរ៉ង់ លោក Masoud Pezeshkian បានឲ្យដឹងថា ក្រោមការណែនាំ របស់មេដឹកនាំកំពូល របស់ប្រទេសនេះ លោក Ali Khamenei ការចរចានាពេលខាងមុខ ជាមួយសហរដ្ឋអាមេរិក នៅក្នុងប្រទេសអូម៉ង់ នឹងត្រូវធ្វើឡើងដោយប្រយោល នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
លោកបានធ្វើការកត់សម្គាល់នៅក្នុងពិធីមួយដើម្បីប្រារព្ធទិវាជាតិនុយក្លេអ៊ែរបច្ចេកវិជ្ជាដែលនឹងប្រព្រឹត្តិទៅនៅថ្ងៃទី ៩ ខែមេសា ខណៈពេលដែលការពិភាក្សាលម្អិតរវាងរដ្ឋមន្ត្រីការបរទេសអ៊ីរ៉ង់លោក Seyed Abbas Araghchi និងបេសកជនពិសេសរបស់សហរដ្ឋអាមេរិកប្រចាំតំបន់មជ្ឈិមបូព៌ាលោក Steve Witkoff ស្តីពីកម្មវិធីនុយក្លេអ៊ែររបស់អ៊ីរ៉ង់ ដែលនឹងប្រព្រឹត្តទៅនៅប្រទេសអូម៉ង់នៅថ្ងៃសៅរ៍។
លោកបានលើកឡើងថា “ជំហររបស់សាធារណរដ្ឋឥស្លាមអ៊ីរ៉ង់លើបញ្ហាសំខាន់ៗគឺការលើកឡើងម្តងហើយម្តងទៀត និងច្បាស់លាស់ដោយមេដឹកនាំកំពូលរបស់ប្រទេសនេះ” លោកបានបន្ថែមថា “ទាក់ទងនឹងបញ្ហាផ្សេងទៀត ការសន្ទនានឹងប្រព្រឹត្តទៅនៅពេលដែលអន្តរកម្មអាចធ្វើទៅបាន” ។
លោក Pezeshkian បានសង្កត់ធ្ងន់ថា អ៊ីរ៉ង់បានត្រៀមខ្លួនរួចជាស្រេចសម្រាប់អន្តរកម្ម និងការសន្ទនា ប៉ុន្តែអន្តរកម្មបែបនេះគួរតែជា “ដោយប្រយោល កិត្តិយស និងជាមួយនឹងការធានាច្បាស់លាស់ ដូចដែលយើងមិនទាន់ជឿទុកចិត្តលើភាគីម្ខាងទៀតនៅឡើយ” ។
ការកត់សម្គាល់របស់លោក Pezeshkian ធ្វើឡើងតាមសេចក្តីថ្លែងការណ៍របស់ប្រធានាធិបតីអាមេរិកលោក ដូណាល់ ត្រាំ ដែលបានលើកឡើងកាលពីថ្ងៃចន្ទក្នុងអំឡុងកិច្ចប្រជុំជាមួយនាយករដ្ឋមន្ត្រីអ៊ីស្រាអែលលោក បេនចាមីន ណេតាន់យ៉ាហ៊ូ ក្នុងទីក្រុងវ៉ាស៊ីនតោនថា “ការពិភាក្សាដោយផ្ទាល់” ជាមួយអ៊ីរ៉ង់ ត្រូវបានរំពឹងទុក។
មន្ត្រីអ៊ីរ៉ង់បានច្រានចោលចរិតលក្ខណៈនោះ ដោយលោក Araghchi បានបញ្ជាក់កាលពីថ្ងៃអង្គារថា កិច្ចប្រជុំដែលបានគ្រោងទុកក្នុងប្រទេសអូម៉ង់ នឹងមានលក្ខណៈប្រយោល និងក្នុងកម្រិតខ្ពស់។ ទន្ទឹមនឹងនេះ ក្រសួងរតនាគារសហរដ្ឋអាមេរិកកាលពីថ្ងៃពុធបានប្រកាសដាក់ទណ្ឌកម្មថ្មីផ្តោតលើអង្គភាពចំនួនប្រាំ រួមទាំងអង្គការថាមពលអាតូមិករបស់អ៊ីរ៉ង់ និងបុគ្គលម្នាក់ ពាក់ព័ន្ធនឹងសកម្មភាពនុយក្លេអ៊ែរ របស់អ៊ីរ៉ង់៕
ប្រែសម្រួល ឈូក បូរ៉ា
