តូក្យូ៖ នាយករដ្ឋមន្ត្រីជប៉ុនលោក Shigeru Ishiba បានណែនាំជំនួយការជិតស្និទ្ធរបស់លោក Ryosei Akazawa ឱ្យធ្វើការចរចារពន្ធនាពេលខាងមុខជាមួយសហរដ្ឋអាមេរិក ដើម្បីជាប្រយោជន៍ដល់ប្រជាជាតិទាំងពីរ ខណៈដែលលោកបានសន្យាថានឹងខិតខំប្រឹងប្រែងរបស់ជប៉ុនទាំងមូលដើម្បីដោះស្រាយ “វិបត្តិជាតិ” ។
លោក Ishiba បានឲ្យដឹងថា រដ្ឋាភិបាលគួរតែរួមបញ្ចូលគ្នានូវធនធាននៅទូទាំងក្រសួង និងទីភ្នាក់ងារនានា ដើម្បីជំរុញឱ្យសហរដ្ឋអាមេរិក ដែលជាសម្ព័ន្ធមិត្តជិតស្និទ្ធបំផុតរបស់ប្រទេសជប៉ុន ដកថយនូវវិធានការពន្ធគយ ដែលត្រូវបានអនុវត្តដោយប្រធានាធិបតីលោក ដូណាល់ ត្រាំ ។ កិច្ចខិតខំប្រឹងប្រែងគួរតែផ្តោតលើការការពារសេដ្ឋកិច្ច ដែលជំរុញការនាំចេញរបស់ប្រទេសជប៉ុនពីការធ្លាក់ចុះដែលរំពឹងទុក។
រដ្ឋមន្ត្រីស្តារសេដ្ឋកិច្ចលោក Akazawa ដែលត្រូវបានគេរំពឹងថា នឹងធ្វើដំណើរទៅសហរដ្ឋអាមេរិកនៅសប្តាហ៍ក្រោយបានប្តេជ្ញាថា នឹងផ្តល់អាទិភាពដល់ការចរចារពន្ធដារ ដើម្បីបង្កើត “លទ្ធផលល្អ” សម្រាប់ប្រទេសជប៉ុន។ លោក Ishiba បានប្រគល់ភារកិច្ចជាផ្លូវការដល់លោក Akazawa ជាមួយនឹងការទទួលខុសត្រូវនៅការិយាល័យនាយករដ្ឋមន្ត្រីកាលពីថ្ងៃសុក្រ។
លោក Ishiba បានប្រាប់កិច្ចប្រជុំក្រុមការងាររដ្ឋាភិបាលថា “ផ្នែកខ្លះនៃពន្ធទៅវិញទៅមកត្រូវបានផ្អាក ប៉ុន្តែមិនមានការផ្លាស់ប្តូរនៅក្នុងការពិតដែលថាវិស័យដូចជា រថយន្ត ដែក និងអាលុយមីញ៉ូម ដែលបម្រើជាឆ្អឹងខ្នងនៃប្រទេសរបស់យើង និងសេដ្ឋកិច្ចពិភពលោកកាន់តែទូលំទូលាយនឹងទទួលរងផលប៉ះពាល់យ៉ាងខ្លាំង” ពីគោលនយោបាយពន្ធរបស់សហរដ្ឋអាមេរិកលោក Ishiba បានប្រាប់កិច្ចប្រជុំក្រុមការងាររដ្ឋាភិបាល៕
ប្រែសម្រួល ឈូក បូរ៉ា
