ខ្មាន់កាំភ្លើងបាញ់រះ នៅសកលវិទ្យាល័យមួយកន្លែង ក្នុងរដ្ឋហ្វ្លរីដាស្លាប់ ២នាក់ របួសជាច្រើននាក់

បរទេស៖ យោងតាមការចេញផ្សាយរបស់ RT ប៉ូលិសក្នុងតំបន់បានអះអាងថា មានហេតុការណ៍ការបាញ់ប្រហារមួយ បានកើតឡើងនៅសាកលវិទ្យាល័យរដ្ឋហ្វ្លរីដា (FSU) បានបណ្តាលឲ្យមនុស្សពីរនាក់បាត់បង់ជីវិត និងជាច្រើននាក់ទៀតរងរបួស រួមទាំងខ្មាន់កាំភ្លើងដែលសង្ស័យផងដែរ ដែលឥឡូវនេះត្រូវបានឃុំខ្លួនរួចទៅហើយ។

យោងតាមទីភ្នាក់ងារព័ត៌មាន AP ដែលទទួលបានសេចក្តីរាយការណ៍ពី ប្រធានប៉ូលិសលោក Jason Trumbowerបានឲ្យដឹងទៀតថា មនុស្សពីរនាក់ដែលបានស្លាប់ មិនមែនជានិស្សិតនៅសាកលវិទ្យាល័យនោះទេ ប៉ុន្តែអ្នកបាញ់ប្រហារត្រូវបានគេជឿថា ជានិស្សិតដែលសិក្សានៅក្នុងសកលវិទ្យាល័យនេះ។

ប្រភពដដែលបានកំណត់អត្តសញ្ញាណជនសង្ស័យថាមានឈ្មោះ Phoenix Ikner អាយុ ២០ឆ្នាំ ជាកូនប្រុសរបស់មន្ត្រីជាន់ខ្ពស់ប៉ូលិសម្នាក់នៅក្នុងតំបន់។

កាំភ្លើងចំនួន៣ដើមត្រូវបាន រកឃើញវិញដែលក្នុងនោះ កាំភ្លើងខ្លីមួយដើមរបស់ជនសង្ស័យ កាំភ្លើងខ្លីមួយដើមនៅក្នុងអគារ Student Union ក្នុងបរិវេណសាលា Tallahassee និងអាវុធមួយទៀតស្ថិតនៅក្នុង រថយន្តដែលចតចោលនៅក្បែរនោះ។

គេដឹងទៀតដែរថាហេតុការនេះ ត្រូវបានគេរាយការណ៍ថា បានកើតឡើងនៅថ្ងៃព្រហស្បត្តិ៍ នៅជិតអគារសម្ព័ន្ធនិស្សិត ដែលក្រោយមកបានបង្ខំឲ្យមានការបិទទ្វារយ៉ាងឆាប់រហ័ស និងបញ្ជាឱ្យមានការជន្លៀសខ្លួនសម្រាប់សិស្ស និងបុគ្គលិកខណៈដែលបច្ចុប្បន្ន និស្សិតជាង៤២,០០០ នាក់ត្រូវបានចុះឈ្មោះនៅសាកលវិទ្យាល័យមួយនេះ៕

ប្រែសម្រួល៖ ស៊ុន លី