សហរដ្ឋអាមេរិក ដាក់បញ្ចូលការ ទទួលស្គាល់តំបន់ Crimea ជាផ្នែកនៃកិច្ចព្រមព្រៀង សន្តិភាពនៅអ៊ុយក្រែន

បរទេស៖ កាសែត Washington Post បានរាយការណ៍ថា ទីក្រុងវ៉ាស៊ីនតោន នឹងស្នើកិច្ចព្រមព្រៀងសន្តិភាព ទទួលស្គាល់អធិបតេយ្យភាពរុស្ស៊ី លើតំបន់គ្រីមៀ​ Crimea និងតំបន់ជួរមុខ ក្នុងជម្លោះអ៊ុយក្រែន ផ្សេងទៀត ក្នុងកិច្ចប្រជុំជាមួយមន្ត្រីអ៊ុយក្រែន និងអឺរ៉ុប នៅសប្តាហ៍នេះ ។

សហរដ្ឋអាមេរិក ត្រូវបានគេរំពឹងថា នឹងធ្វើកិច្ចចរចានៅទីក្រុងឡុងដ៍ នៅថ្ងៃពុធជាមួយ មន្ត្រីអ៊ុយក្រែន និងអឺរ៉ុប ខណៈដែលប្រធានាធិបតីអាមេរិក លោក Donald Trump បន្តជំរុញរបស់គាត់ សម្រាប់កិច្ចព្រមព្រៀងមួយ ។
បេសកជនរបស់ លោក Trump លោក Keith Kellogg គ្រោងនឹងជួបជា មួយរដ្ឋមន្ត្រីការបរទេស និងទីប្រឹក្សាសន្តិសុខ មកពីប្រទេសបារាំង អាល្លឺម៉ង់ ចក្រភពអង់គ្លេស និងអ៊ុយក្រែន ខណៈដែលរដ្ឋមន្ត្រីការបរទេស Marco Rubio និង Steve Witkoff នឹងរំលងកិច្ចប្រជុំ។

ប្រភពដែលដឹងពី បញ្ហានេះ បានប្រាប់សារព័ត៌មាន កាលពីថ្ងៃអង្គារថា សំណើរបស់សហរដ្ឋអាមេរិក ដែលបានបង្ហាញ ដល់អ៊ុយក្រែន នៅទីក្រុងប៉ារីសកាលពីសប្តាហ៍មុន រួមមានទីក្រុងវ៉ាស៊ីនតោនទទួល ស្គាល់គ្រីមៀជាផ្លូវការថាជាទឹកដី របស់រុស្ស៊ី ហើយនៅទីបំផុតការដកទណ្ឌកម្ម ប្រឆាំងនឹងទីក្រុងម៉ូស្គូ ក្រោមកិច្ចព្រមព្រៀង នាពេលអនាគតផងដែរ។

របាយការណ៍ក៏បាននិយាយដែរថា មន្ត្រីអឺរ៉ុបត្រូវបានគេរំពឹងថានឹងជំរុញ ឱ្យមានការធានាសន្តិសុខសម្រាប់អ៊ុយក្រែន និងកិច្ចខិតខំប្រឹងប្រែង កសាងឡើងវិញ ក្រោយសង្គ្រាម ដែលអាចត្រូវបាន ផ្តល់មូលនិធិមួយ ផ្នែកដោយទ្រព្យសម្បត្តិ របស់រុស្ស៊ី ដែលបានបង្កក ទាំងនោះផងដែរ ៕

ប្រែសម្រួល៖ស៊ុនលី