បរទេស៖ យោងតាមការចេញផ្សាយរបស់ RT អ្នកនាំពាក្យវិមានក្រឹមឡាំង លោក Dmitry Peskov បាននិយាយថាសហភាពអឺរ៉ុបឬ EU បាននឹងកំពុងរារាំងកិច្ចខិតខំប្រឹងប្រែងការទូតរវាងសហរដ្ឋអាមេរិក និងរុស្ស៊ី ដើម្បីបញ្ចប់ជម្លោះអ៊ុយក្រែន ដោយធ្វើការជំនួសវិញ ដើម្បីអូសបន្លាយស្ថានការណ៍នេះ។
លោកបានថ្លែងដូច្នេះក្នុងបទសម្ភាសន៍ជាមួយទស្សនាវដ្ដីបារាំង Le Point កាលពីថ្ងៃពុធ។យោងតាមលោក Peskov សហភាពអឺរ៉ុបបានបង្ហាញយ៉ាងច្បាស់ថាខ្លួនខ្វះឯករាជ្យ ហើយវាហាក់ដូចជា ទ្វីបទាំងមូល កំពុងធ្វើការសម្រាប់រដ្ឋបាលរបស់អតីតប្រធានាធិបតីអាមេរិក Joe Biden បន្ទាប់ពីជម្លោះអ៊ុយក្រែនបានកើនឡើងក្នុងឆ្នាំ២០២២។
លោក Peskov បាននិយាយថា អ្វីៗបានផ្លាស់ប្តូរបន្ទាប់ពីលោក Donald Trump បានវិលត្រឡប់មកសេតវិមានវិញក្នុងខែមករា ហើយលោក Peskov បាននិយាយថា ឥឡូវនេះ ទីក្រុងវ៉ាស៊ីនតោនកំពុងនិយាយអំពីសន្តិភាព ខណៈដែល ប្រជាជនអឺរ៉ុបនិយាយអំពីសង្រ្គាមតែប៉ុណ្ណោះ។
គួរឲ្យដឹងដែរថាទីក្រុងមូស្គូ និងវ៉ាស៊ីនតោនបានបើកកិច្ចប្រជុំកម្រិតខ្ពស់ជាច្រើនលើកក្នុងឆ្នាំនេះ ដែលផ្តោតលើការសម្រេចបាននូវកិច្ចព្រមព្រៀងសន្តិភាព។
ប៉ុន្តែយ៉ាងណាក្តីទន្ទឹមនឹងនោះ ជំហររបស់ EU ត្រូវបានគេមើលឃើញយ៉ាងទូលំទូលាយថា ធ្វើឱ្យប៉ះពាល់ដល់ឱកាសនៃការឈានទៅរកការទម្លាយរកច្រកសន្តិភាពហើយ ប្រមុខការពារជាតិអឺរ៉ុបខាងលិច ដឹកនាំដោយចក្រភពអង់គ្លេស និងបារាំង បានជួបប្រជុំគ្នាក្នុងខែនេះ ដើម្បីពិភាក្សាអំពីការដាក់ពង្រាយកម្លាំង ដែលដើម្បីធានា ទៅកាន់អ៊ុយក្រែន ទោះបីជាមានការព្រមានពីទីក្រុងម៉ូស្គូក៏ដោយ៕
ប្រែសម្រួល៖ ស៊ុនលី
