យេម៉ែន៖ ក្រុមហ៊ូទី បានអះអាងថា យន្តហោះចម្បាំងរបស់សហរដ្ឋអាមេរិក បានធ្វើការវាយឆ្មក់ចំនួន ១,២០០លើក លើប្រទេសយេម៉ែនចាប់តាំងពីពាក់កណ្តាលខែមីនា ដែលបណ្តាលឱ្យមានជនស៊ីវិលរាប់រយនាក់ស្លាប់ និងរងរបួស និងការបំផ្លិចបំផ្លាញហេដ្ឋារចនាសម្ព័ន្ធយ៉ាងធ្ងន់ធ្ងរ។
នៅក្នុងសេចក្តីថ្លែងការណ៍មួយ អាជ្ញាធរកិច្ចការបរទេសនៃក្រុមនេះបានចោទប្រកាន់ថា ប្រតិបត្តិការរបស់សហរដ្ឋអាមេរិក បានបំផ្លាញ “កន្លែងជនស៊ីវិលជាច្រើន រួមទាំងលំនៅដ្ឋាន កំពង់ផែ មន្ទីរពេទ្យ អាងទឹក និងទីតាំងបុរាណវត្ថុ ដោយបំពានលើច្បាប់អន្តរជាតិ និងច្បាប់មនុស្សធម៌អន្តរជាតិ”។
ក្រុមនេះបានចោទប្រកាន់ក្រុងវ៉ាស៊ីនតោនថា បានធ្វើការប៉ុនប៉ងដ៏អាក្រក់ ដើម្បីគេចចេញពីការទទួលខុសត្រូវរបស់ខ្លួន ចំពោះឧក្រិដ្ឋកម្មដែលខ្លួនកំពុងប្រព្រឹត្តនៅក្នុងប្រទេសយេម៉ែន និងធ្វើការដើម្បីបិទបាំងអំពើបាបដ៏អាក្រក់របស់ខ្លួនប្រឆាំងនឹងយេម៉ែន និងឧក្រិដ្ឋកម្មរបស់ខ្លួនប្រឆាំងនឹងជនស៊ីវិល”។
រដ្ឋាភិបាលសហរដ្ឋអាមេរិកមិនបានចេញការឆ្លើយតបភ្លាមៗចំពោះការចោទប្រកាន់របស់ក្រុមហ៊ូទី ទាំងនេះនៅឡើយទេ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
សហរដ្ឋអាមេរិកបានបន្តប្រតិបត្តិការយោធាប្រឆាំងនឹងយេម៉ែននៅថ្ងៃទី១៥ ខែមីនា បន្ទាប់ពីលោកប្រធានាធិបតី ដូណាល់ ត្រាំ បានបញ្ជាឲ្យមានសកម្មភាពយោធាយ៉ាងម៉ឺងម៉ាត់និងមានឥទ្ធិពលប្រឆាំងនឹងកងកម្លាំងហ៊ូទី។ លោក ត្រាំ បានសន្យាជាបន្តបន្ទាប់ថា ការវាយប្រហារនឹងបន្តរហូតដល់ក្រុមនេះមិនបង្កការគំរាមកំហែងដល់ “សេរីភាពនៃការធ្វើនាវាចរណ៍”។
ទោះបីជាមានការគម្រាមកំហែងទាំងនេះក៏ដោយ ក៏ក្រុមហ៊ូទី ត្រូវបានគេរាយការណ៍ថា បានបង្កើនការវាយប្រហាររបស់ពួកគេទៅលើអ៊ីស្រាអែល ក៏ដូចជាលើកងកម្លាំងទ័ពជើងទឹកសហរដ្ឋអាមេរិក និងយន្តហោះដ្រូន ដែលកំពុងប្រតិបត្តិការនៅសមុទ្រក្រហម៕
ប្រែសម្រួល ឈូក បូរ៉ា
