ប៉េកាំង៖ អ្នកនាំពាក្យក្រសួងការបរទេសចិនបានឲ្យដឹងថា សហរដ្ឋអាមេរិក គឺជាអ្នករំខានដ៏ធំបំផុតចំពោះប្រព័ន្ធគ្រប់គ្រងអាវុធអន្តរជាតិ និងមិនរីកសាយភាយអាវុធ ហើយប្រទេសចិនជំរុញឱ្យសហរដ្ឋអាមេរិកពិនិត្យមើលសកម្មភាពរបស់ខ្លួនដោយយកចិត្តទុកដាក់ និងឆ្លើយតបយ៉ាងសកម្មចំពោះការព្រួយបារម្ភរបស់សហគមន៍អន្តរជាតិ។
អ្នកនាំពាក្យចិនលោក Guo Jiakun បានធ្វើការកត់សម្គាល់នៅក្នុងសន្និសីទសារព័ត៌មានប្រចាំថ្ងៃ នៅពេលដែលត្រូវបានសួរឱ្យធ្វើអត្ថាធិប្បាយលើអ្វីដែលគេហៅថា “ការប្រកាន់ខ្ជាប់ និងការអនុលោមតាមការគ្រប់គ្រងអាវុធ ការមិនរីកសាយភាយ និងការប្តេជ្ញាចិត្ត និងការរំសាយអាវុធ” ដែលចេញផ្សាយដោយក្រសួងការបរទេសសហរដ្ឋអាមេរិកនាពេលថ្មីៗនេះ។
លោកបានលើកឡើងថា រដ្ឋាភិបាលសហរដ្ឋអាមេរិក ពីមួយឆ្នាំទៅមួយឆ្នាំ បានប្រមូលរបាយការណ៍បែបនេះ ដោយបានធ្វើឱ្យប្រទេសដទៃទៀត លាបពណ៌ដោយគ្មានមូលដ្ឋាន ខណៈពេលដែលមិននិយាយអ្វីអំពីសកម្មភាពអវិជ្ជមានរបស់ខ្លួនក្នុងការគ្រប់គ្រងអាវុធ ការមិនរីកសាយភាយ និងការរំសាយអាវុធ។
លោកបន្ដថា នេះគឺជាតក្កវិជ្ជាអនុត្តរភាពធម្មតា និងស្តង់ដារទ្វេរដង ហើយប្រទេសចិនបានបញ្ជាក់ពីការប្រឆាំងរបស់ខ្លួនច្រើនជាងម្តង និងបានធ្វើការតវ៉ាយ៉ាងធ្ងន់ធ្ងរ។
លោកបានបន្ថែមថា នៅក្នុងការងារនៃការគ្រប់គ្រងអាវុធ និងការមិនរីកសាយភាយនៅទូទាំងពិភពលោក ប្រទេសចិន នៅតែប្តេជ្ញាចិត្តចំពោះពហុភាគីនិយមពិតប្រាកដ ការពារយ៉ាងរឹងមាំនូវប្រព័ន្ធអន្តរជាតិជាមួយអង្គការសហប្រជាជាតិជាស្នូល និងសណ្តាប់ធ្នាប់អន្តរជាតិដោយផ្អែកលើច្បាប់អន្តរជាតិ បំពេញកាតព្វកិច្ច និងការប្តេជ្ញាចិត្តអន្តរជាតិដោយស្មោះស្ម័គ្រ និងបានចាត់វិធានការជាក់ស្តែង ដើម្បីលើកកម្ពស់ប្រព័ន្ធគ្រប់គ្រងអាវុធអន្តរជាតិ និងការមិនរីកសាយភាយអាវុធ។
ក្នុងរយៈពេលប៉ុន្មានឆ្នាំចុងក្រោយនេះ សហរដ្ឋអាមេរិក បានពង្រឹងកម្លាំងយោធារបស់ខ្លួនយ៉ាងខ្លាំងក្លា ជំរុញឱ្យមានការប្រឈមមុខដាក់គ្នាជាមួយប្រទេសធំៗ និងបានធ្វើឱ្យខូចយ៉ាងធ្ងន់ធ្ងរដល់ស្ថិរភាពយុទ្ធសាស្ត្រសកល និងក្នុងតំបន់។
លោកបានបន្ថែមទៀតថា សហរដ្ឋអាមេរិក បានត្រឹមតែដកខ្លួនចេញពីសន្ធិសញ្ញា និងអង្គការអន្តរជាតិ ដោយមិនអើពើសណ្តាប់ធ្នាប់ ច្បាប់ និងកាតព្វកិច្ចអន្តរជាតិ ហើយបានដើរតួជាអ្នករំខានដ៏ធំបំផុតចំពោះប្រព័ន្ធគ្រប់គ្រងអាវុធអន្តរជាតិ និងមិនរីកសាយភាយអាវុធ៕
ប្រែសម្រួល ឈូក បូរ៉ា
