លោក ត្រាំ ឈានដល់កិច្ចព្រមព្រៀង ពាណិជ្ជកម្មជាមួយអង់គ្លេស ដែលអាចផ្តល់ផ្លូវសម្រាប់្រទេសផ្សេងទៀត

វ៉ាស៊ិនតោន៖ ប្រធានាធិបតីអាមេរិក លោក ដូណាល់ ត្រាំ បានឲ្យដឹងថា កិច្ចព្រមព្រៀងពាណិជ្ជកម្ម ដែលនឹងបង្កើនលទ្ធភាពទទួលបានទីផ្សារ សម្រាប់ការនាំចេញ កសិផលរបស់អាមេរិក ត្រូវបានឈានដល់ជាមួយចក្រភពអង់គ្លេស ដោយសាទរថាវាជាកិច្ចព្រមព្រៀង “ដ៏អស្ចារ្យ” និងជាលើកដំបូងក្នុង ចំណោមមនុស្សជាច្រើន ដែលបានមក បន្ទាប់ពីរលកពន្ធគយ ដ៏សន្ធឹកសន្ធាប់របស់លោក បានធ្វើឱ្យប្រទេសនានា មានការព្រួយបារម្ភជុំវិញពិភពលោក ។

ជាថ្នូរនឹងគ្នា រដ្ឋបាលលោក ត្រាំ បានយល់ព្រមលើការរៀបចំ ដូចជាការអនុញ្ញាតឱ្យចក្រភពអង់គ្លេសនាំចេញរថយន្តចំនួន ១០០,០០០ គ្រឿងក្នុងមួយឆ្នាំទៅកាន់ទីផ្សារសហរដ្ឋអាមេរិក ជាមួយនឹងពន្ធត្រឹមតែ ១០ ភាគរយ ដោយផ្តល់នូវការលើកលែងមួយផ្នែកពីការយកពន្ធរថយន្ត ២៥ ភាគរយថ្មីរបស់លោក ។

កូតាប្រចាំឆ្នាំ គឺជាអត្ថប្រយោជន៍ សម្រាប់ក្រុមហ៊ុន Jaguar Land Rover និងចក្រភពអង់គ្លេស ដោយសាររថយន្តគឺជាការនាំចេញ ដ៏ធំបំផុតរបស់ខ្លួន ទៅកាន់សហរដ្ឋអាមេរិក ។ ចំនួននេះគ្របដណ្តប់ជិតចំនួនសរុបដែលវានាំចេញទៅសហរដ្ឋអាមេរិកក្នុងឆ្នាំ២០២៤ ។ កិច្ចព្រមព្រៀងនេះ បានបន្សល់ទុកនូវពន្ធមូលដ្ឋាន ១០ ភាគរយដែលលោក ត្រាំ បានដាក់កាលពីខែមេសាលើប្រទេសស្ទើរតែទាំងអស់ ប៉ុន្តែយោងតាមរដ្ឋាភិបាល អង់គ្លេស សហរដ្ឋអាមេរិកនឹងដកពន្ធបន្ថែម ២៥ ភាគរយលើដែកថែប និងអាលុយមីញ៉ូម។

ទន្ទឹមនឹងនោះ មន្ត្រីសេតវិមានម្នាក់បានឲ្យថា ប្រទេសទាំងពីរមិនទាន់សម្រេចចិត្តលើ ចំណុចជាក់លាក់នៃកិច្ចព្រមព្រៀងជំនួស ដាច់ដោយឡែកមួយស្តីពីដែកថែប និងអាលុយមីញ៉ូមនោះទេ។ លោក ត្រាំ បានប្រាប់អ្នកយកព័ត៌មាននៅក្នុងការិយាល័យ Oval ថា “ជាមួយនឹងកិច្ចព្រមព្រៀងនេះ ចក្រភពអង់គ្លេស បានចូលរួមជាមួយសហរដ្ឋអាមេរិកក្នុងការបញ្ជាក់ថា ការឆ្លើយឆ្លង និងយុត្តិធម៌ គឺជាគោលការណ៍សំខាន់ នៃពាណិជ្ជកម្មអន្តរជាតិ” ។

សេតវិមានបានឲ្យដឹងទៀតថា កិច្ចព្រមព្រៀង “កំណត់សម្លេង សម្រាប់ដៃគូពាណិជ្ជកម្មផ្សេងទៀត ដើម្បីលើកកម្ពស់ពាណិជ្ជកម្ម ទៅវិញទៅមកជាមួយសហរដ្ឋអាមេរិក” ។ នៅក្រោមកិច្ចព្រមព្រៀងនេះ ចក្រភពអង់គ្លេស នឹងពង្រីកការចូលប្រើប្រាស់ ទីផ្សារសម្រាប់ផលិតផលកសិកម្មរបស់អាមេរិក ជាពិសេសដូចជាសាច់គោ និងជីវអេតាណុល និងកាត់បន្ថយរបាំងមិនមែនពន្ធ។

រដ្ឋមន្ត្រីក្រសួង ពាណិជ្ជកម្មអាមេរិកលោក Howard Lutnick បានឲ្យដឹងថា កិច្ចព្រមព្រៀងនេះនឹងផ្តល់ឱកាសចំនួន ៥ ពាន់លានដុល្លារ សម្រាប់ការនាំចេញថ្មី ដោយកសិករ អ្នកចិញ្ចឹមសត្វ និងផលិតករអាមេរិក។ រដ្ឋាភិបាលអង់គ្លេសបានឲ្យដឹងថា ការទទួលបានទីផ្សារ សាច់គោគឺជាការឈ្នះសម្រាប់ភាគីទាំងពីរ ដោយកត់សម្គាល់ថាកសិករចក្រភពអង់គ្លេសត្រូវបានផ្តល់កូតាគ្មានពន្ធចំនួន ១៣,០០០ តោន៕
ប្រែសម្រួល ឈូក បូរ៉ា