យូអិន៖ តំណាងអចិន្ត្រៃយ៍ របស់ប្រទេសចិន ប្រចាំនៅអង្គការ សហប្រជាជាតិ លោក Sun Lei បានអំពាវនាវឱ្យភាគី ទាំងអស់ បន្ធូរបន្ថយភាពតានតឹង នៅសមុទ្រក្រហម បន្តការសន្ទនានយោបាយ ក្នុងប្រទេសយេម៉ែន និងបង្កើនជំនួយមនុស្សធម៌ ដើម្បីដោះស្រាយវិបត្តិកាន់ តែអាក្រក់របស់ប្រទេសនេះ។
លោកបានឲ្យដឹងនៅឯសន្និសីទ សង្ខេបក្រុមប្រឹក្សាសន្តិសុខអង្គការ សហប្រជាជាតិ ស្តីពីយេម៉ែនថា “ស្ថានភាពនៅសមុទ្រក្រហម នៅតែបន្តប្រែប្រួល ដែលគួរឱ្យព្រួយបារម្ភ” ដោយសំអាងលើការវាយប្រហារ តាមផ្លូវអាកាសរបស់សហរដ្ឋអាមេរិក និង អង់គ្លេសនាពេលថ្មីៗនេះលើយេម៉ែន រួមជាមួយនឹងការវាយប្រហារឆ្លង រវាងក្រុមហ៊ូទី និងអ៊ីស្រាអែល ដែលបានបណ្តាលឱ្យមានអ្នកស្លាប់ និងរបួសយ៉ាងធ្ងន់ធ្ងរ និងខូចខាតហេដ្ឋារចនាសម្ព័ន្ធ។
លោកបានស្វាគមន៍ ចំពោះកិច្ចព្រមព្រៀងបទឈប់បាញ់នាពេលថ្មីៗនេះ ដែលសម្រេចបានរវាងសហរដ្ឋអាមេរិក និងក្រុមហ៊ូទី ហើយបានសរសើរដល់កិច្ចខិតខំប្រឹងប្រែងការទូតរបស់ប្រទេសអូម៉ង់ក្នុងការសម្របសម្រួលកិច្ចព្រមព្រៀងនេះ ដោយលោកបានលើកឡើងថា “យើងសង្ឃឹមថាគ្រប់ភាគីនឹងយកឱកាសនេះជាឱកាសមួយដើម្បីបន្ថយស្ថានការណ៍នៅពេលឆាប់ៗនេះ”។
លោកបានបន្ថែមថា “ប្រទេសចិន បានរំលឹកឡើងវិញនូវការអំពាវនាវរបស់ខ្លួនឱ្យភាគីទាំងអស់អនុវត្តភាពស្ងប់ស្ងាត់ និងការអត់ធ្មត់ និងជៀសវាងសកម្មភាពណាមួយដែលធ្វើឱ្យភាពតានតឹងកាន់តែធ្ងន់ធ្ងរ” ។
លោកបានបញ្ជាក់ថា “យើងអំពាវនាវ ឱ្យក្រុមហ៊ូទី បញ្ឈប់ការវាយលុកលើនាវាពាណិជ្ជកម្ម និងរក្សាសុវត្ថិភាព នៃផ្លូវដឹកជញ្ជូន សមុទ្រក្រហម ហើយអធិបតេយ្យភាព សន្តិសុខ និងបូរណភាព ទឹកដីនៃប្រទេសយេម៉ែន គួរតែត្រូវបានគោរព ហើយកិច្ចព្រមព្រៀង បទឈប់បាញ់ ដែលសម្រេចបានគួរតែត្រូវបានអនុវត្ត” ។
លោកបានគូសបញ្ជាក់ថា ទីបំផុតវិបត្តិនៅយេម៉ែនត្រូវតែដោះស្រាយតាមរយៈមធ្យោបាយនយោបាយ ។ លោកបានបន្តថា “បញ្ហាយេម៉ែនមានហេតុផលស្មុគស្មាញ ហើយទីបំផុតទាមទារ ដំណោះស្រាយនយោបាយ។
លោកបានបន្ថែមថា “យើងអំពាវនាវឱ្យភាគីទាំងអស់ក្នុងប្រទេសយេម៉ែន បង្ហាញការប្តេជ្ញាចិត្ត និងឆន្ទៈ បន្តទំនាក់ទំនង និងការប្រាស្រ័យទាក់ទងគ្នា ដោះស្រាយ ភាពខុសគ្នាតាមរយៈការសន្ទនា និងការចរចា និងជំរុញដំណើរការ នយោបាយដ៏ ទូលំទូលាយមួយ ដែលដឹកនាំដោយយេម៉ែន និងជាកម្មសិទ្ធិ របស់យេម៉ែន ដើម្បីសម្រេចបាននូវការផ្សះផ្សា និងការកសាងសេដ្ឋកិច្ចឡើងវិញ នៅដំណាក់កាលដំបូង”៕
