មូស្គូ៖ យោងតាមសេចក្តីថ្លែងការណ៍ របស់វិមានក្រឹមឡាំងប្រធានាធិបតីរុស្ស៊ី លោក វ្ល៉ាឌីមៀ ពូទីន បានអនុម័តសមាសភាព គណៈប្រតិភូរុស្ស៊ី សម្រាប់កិច្ចពិភាក្សានាពេលខាងមុខ ជាមួយអ៊ុយក្រែន នៅទីក្រុងអ៊ីស្តង់ប៊ុល ប្រទេសតួកគី ។
គណៈប្រតិភូនឹងដឹកនាំដោយជំនួយ ការប្រធានាធិបតីរុស្ស៊ី លោក Vladimir Medinsky និងរួមមានអនុរដ្ឋមន្ត្រី ការបរទេសលោក Mikhail Galuzin លោក Igor Kostyukov ប្រធាននាយកដ្ឋានសំខាន់ នៃបុគ្គលិកទូទៅនៃកងទ័ពរុស្ស៊ី និងអនុរដ្ឋមន្ត្រីការពារជាតិរុស្ស៊ីលោក Alexander Fomin ។
ក្រៅពីសមាជិកគណៈប្រតិភូ បញ្ជីឈ្មោះអ្នកជំនាញ បួននាក់ក៏ត្រូវបានអនុម័ត សម្រាប់កិច្ចពិភាក្សាដែរ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
នៅក្នុងសេចក្តីថ្លែងការណ៍មួយ កាលពីថ្ងៃអាទិត្យ លោក ពូទីន បានស្នើឱ្យបន្តការចរចាដោយផ្ទាល់ ជាមួយអ៊ុយក្រែននៅថ្ងៃទី១៥ ខែឧសភានៅទីក្រុងអ៊ីស្តង់ប៊ុល។ ប្រធានាធិបតីអ៊ុយក្រែន លោក វូឡូឌីមៀ ហ្សេឡិនស្គី បានលើកឡើងថា លោកនឹងនៅ តួកគី នៅថ្ងៃព្រហស្បតិ៍នេះ ហើយរំពឹងថា នឹងជួបជាមួយលោក ពូទីន៕
ប្រែសម្រួល ឈូក បូរ៉ា
