សាស្ត្រាចារ្យជនជាតិអាមេរិក នៅតែជាប់ឃុំ ក្នុងប្រទេស ថៃដដែល ទោះបីព្រះរាជអាជ្ញា ទម្លាក់ការចោទប្រកាន់ ពីបទប្រមាថព្រះមហាក្សត្រ

បរទេស៖ គ្រួសាររបស់គាត់បាននិយាយថា សាស្រ្តាចារ្យជនជាតិអាមេរិកម្នាក់នៅតែស្ថិតក្នុងការឃុំខ្លួនក្នុងប្រទេសថៃ បន្ទាប់ពីព្រះរាជអាជ្ញាបានទម្លាក់ការចោទប្រកាន់ លើគាត់ពីបទប្រមាថព្រះមហាក្សត្រ ខណៈដែលហានិភ័យផ្លូវច្បាប់ នៅតែបន្តនៅក្នុងករណី ដែលបង្កឱ្យមានការព្រួយបារម្ភ នៅក្នុងរដ្ឋាភិបាលសហរដ្ឋអាមេរិក។

យោងតាមសារព័ត៌មាន បាងកក ប៉ុស្តិ៍ ចេញផ្សាយនៅថ្ងៃទី១៦ ខែឧសភា ឆ្នាំ២០២៥ បានឱ្យដឹងថា លោក Paul Chambers សាស្ត្រាចារ្យផ្នែកវិទ្យាសាស្ត្រ នយោបាយត្រូវបានចាប់ខ្លួន កាលពីខែមុន នៅក្នុងករណីដ៏កម្រ នៃការប្រមាថព្រះមហាក្សត្រប្រឆាំង នឹងជនបរទេស។ គាត់អាចប្រឈមនឹង ការជាប់ពន្ធនាគាររហូតដល់ ១៥ ឆ្នាំ ដោយផ្អែកលើពាក្យបណ្តឹង ដែលដាក់ដោយកងទ័ពរាជានិយម។

បងប្រុសរបស់គាត់ឈ្មោះ Kit Chambers បានប្រាប់រ៉យទ័រថា “គាត់មិនត្រូវបានអនុញ្ញាតឱ្យចាកចេញពីប្រទេសទេ យើងមិនច្បាស់ថាហេតុអ្វីទេ” ។ បងប្រុសរបស់គាត់បាននិយាយថា គ្រួសាររបស់គាត់នៅសហរដ្ឋអាមេរិក រួមទាំងម្តាយរបស់គាត់ ដែលមានអាយុ ៨៥ ឆ្នាំ គិតថាគាត់នឹងត្រលប់មកផ្ទះវិញ ប៉ុន្តែគាត់នៅតែស្ថិតក្នុង ស្ថានភាពផ្លូវច្បាប់នៅឡើយ។

ទោះបីជាព្រះរាជអាជ្ញារដ្ឋ បានទម្លាក់ការចោទប្រកាន់ របស់ខ្លួនកាលពីពីរសប្តាហ៍មុនក៏ដោយ ក៏ប៉ូលីសនៅតែអាច បន្តសំណុំរឿងនេះ ដែលរួមមានការចោទប្រកាន់ ពីបទឧក្រិដ្ឋកម្មកុំព្យូទ័រ។

លោក Chambers អាយុ ៥៨ ឆ្នាំបានបាត់បង់ទិដ្ឋាការការងារ និងការងារ នៅសាកលវិទ្យាល័យ Naresuan ហើយលិខិតឆ្លងដែន របស់គាត់ត្រូវបានរឹបអូស។ គាត់បានបដិសេធការចោទប្រកាន់នេះ បានប្តឹងឧទ្ធរណ៍ប្រឆាំង នឹងការដកហូតទិដ្ឋាការ និងការរឹបអូសលិខិតឆ្លងដែនរបស់គាត់ និងកំពុងជំទាស់នឹងការបណ្តេញចេញ៕
ប្រែសម្រួលៈ ណៃ តុលា