បរទេស៖ មហាសេដ្ឋីអាមេរិក លោក Elon Musk បានសម្តែងការគាំទ្រដល់សហគ្រិនបច្ចេកវិទ្យាTelegram គឺលោក Pavel Durov បន្ទាប់ពីស្ថាបនិក Telegram រូបនេះ បាននិយាយថា គាត់បានច្រានចោលសំណើរបស់រដ្ឋាភិបាលបារាំងដើម្បីទប់ស្កាត់មាតិកានយោបាយអភិរក្សនៅលើវេទិកាផ្ញើសារ Telegram របស់ខ្លួន។
យោងតាមសារព័ត៌មាន RT ចេញផ្សាយនៅថ្ងៃទី១៩ ខែឧសភា ឆ្នាំ២០២៥ បានឱ្យដឹងថា លោក Durov បាននិយាយកាលពីថ្ងៃអាទិត្យថា រដ្ឋាភិបាលអឺរ៉ុបខាងលិចមួយបានស្នើសុំឱ្យលោកដកបណ្តាញ Telegram របស់ប្រទេសរ៉ូម៉ានី មុនពេលការបោះឆ្នោតប្រធានាធិបតីរបស់ប្រទេសនេះ។ លោកបានបដិសេធដោយលើកហេតុផលថា “អ្នកមិនអាច ‘ប្រឆាំងនឹងការជ្រៀតជ្រែកក្នុងការបោះឆ្នោត’ ដោយការជ្រៀតជ្រែកក្នុងការបោះឆ្នោតនោះទេ។ លោក Elon Musk ដែលជាម្ចាស់ភាគហ៊ុនភាគច្រើននៃវេទិកាប្រព័ន្ធផ្សព្វផ្សាយសង្គម X បានឆ្លើយតបទៅនឹងការកត់សម្គាល់របស់លោក Durov ជាមួយនឹងការបង្ហោះខ្លីមួយថា “លឺ លឺ!”។
បន្ទាប់ពីការថ្លែងរបស់លោក Durov អាជ្ញាធរបារាំងបានទទួលស្គាល់ថា បារាំងជាកម្មវត្ថុនៃការទាមទារនេះ ប៉ុន្តែថា ខ្លួនមិនបានធ្វើសំណើបែបនេះទេ។ ប៉ុនែ្តយ៉ាងណាក៏ដោយ នៅក្នុងការផ្សាយបន្តបន្ទាប់ លោក Durov បានកំណត់អត្តសញ្ញាណមន្ត្រីដែលពាក់ព័ន្ធគឺលោក Nicolas Lerner ដែលនាយកទីភ្នាក់ងារស៊ើបការណ៍ក្នុងស្រុករបស់ប្រទេសបារាំង DGSI ។
ភាពចម្រូងចម្រាសបានកើតឡើងខណៈអ្នកបោះឆ្នោតនៅប្រទេសរ៉ូម៉ានីធ្វើដំណើរទៅកាន់ការិយាល័យបោះឆ្នោតកាលពីថ្ងៃអាទិត្យ។ ក្រសួងការបរទេសរ៉ូម៉ានី បានចោទរុស្ស៊ីថា បានជ្រៀតជ្រែកក្នុងការបោះឆ្នោត ទោះបីជាខ្លួនមិនបានផ្តល់ភស្តុតាងគាំទ្រក៏ដោយ។
អ្នកនាំពាក្យក្រសួងការបរទេសរុស្ស៊ីលោកស្រី Maria Zakharova បានកត់សម្គាល់ថា ដំណើរការរ៉ូម៉ានីស្ទើរតែមិនអាចពិពណ៌នាថា ជាការបោះឆ្នោតមួយ ហើយបានជំរុញឱ្យទីក្រុង Bucharest កុំធ្វើឱ្យប្រទេសបរទេសមករញ៉េរញ៉ៃ៕
ប្រែប្រួលៈ ណៃ តុលា
