ប៉េកាំង៖ មន្ត្រីនៃការិយាល័យស្ថិតិជាតិ (NBS) បានឲ្យដឹងថា សេដ្ឋកិច្ចរបស់ប្រទេសចិន បានទប់ទល់នឹងសម្ពាធ និងរក្សាបាននូវកំណើនស្ថិរភាព ដោយបន្តនៅលើផ្លូវនៃការអភិវឌ្ឍន៍ ជាវិជ្ជមានចំពេលមានការប្រកួតប្រជែងផ្ទៃក្នុង និងការកើនឡើងនូវសម្ពាធពីខាងក្រៅ នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
អ្នកនាំពាក្យរបស់ NBS លោក Fu Linghui បានឲ្យដឹងនៅក្នុងសន្និសីទសារព័ត៌មានថា ទស្សនវិស័យវិជ្ជមានជាមូលដ្ឋានសម្រាប់សេដ្ឋកិច្ចរបស់ប្រទេសចិនមិនមានការផ្លាស់ប្តូរនោះទេ ហើយមានលក្ខខណ្ឌអំណោយផលជាច្រើនសម្រាប់ការងើបឡើងវិញនៃសេដ្ឋកិច្ចប្រកបដោយនិរន្តរភាព។
ទិន្នន័យ NBS បានបង្ហាញថា ការលក់រាយទំនិញប្រើប្រាស់របស់ប្រទេសចិន ដែលជាសូចនាករសំខាន់នៃកម្លាំងប្រើប្រាស់របស់ប្រទេសបានកើនឡើង ៥.១ ភាគរយពីមួយឆ្នាំទៅមួយឆ្នាំក្នុងខែមេសាដល់ ៣.៧២ ទ្រីលានយន់ (ប្រហែល ៥១៧.២៧ ពាន់លានដុល្លារ)។ ចាប់ពីខែមករា ដល់ខែមេសា ការលក់រាយនៃទំនិញប្រើប្រាស់បានកើនឡើង ៤.៧ ភាគរយពីមួយឆ្នាំទៅមួយឆ្នាំ ដោយបង្កើនល្បឿនពីកំណើន ៤.៦ ភាគរយក្នុងរយៈពេល ៣ខែដំបូង នេះបើយោងតាម NBS ។
ក្នុងរយៈពេល ៤ ខែដំបូងសន្ទស្សន៍ផលិតកម្មសេវាកម្មបានកើនឡើង ៥.៩ ភាគរយពីមួយឆ្នាំទៅមួយឆ្នាំ ០.១ ភាគរយលឿនជាងត្រីមាសទីមួយនេះបើយោងតាមទិន្នន័យរបស់ NBS ។ ទិន្នន័យបានបង្ហាញថានៅក្នុងខែមេសា តម្លៃសរុបនៃការនាំចូល និងនាំចេញទំនិញឈានដល់ ៣.៨៤ ពាន់ពាន់លានយន់ កើនឡើង ៥.៦ ភាគរយពីមួយឆ្នាំទៅមួយឆ្នាំ។ ចាប់ពីខែមករាដល់ខែមេសា ទំហំនាំចូល និងនាំចេញនៃពាណិជ្ជកម្មទូទៅបានកើនឡើង ០.៦ ភាគរយពីមួយឆ្នាំទៅមួយឆ្នាំ ស្មើនឹង ៦៤ ភាគរយនៃតម្លៃពាណិជ្ជកម្មសរុប។
ក្នុងរយៈពេល ៤ ខែដំបូង សហគ្រាសឯកជនបានឃើញការកើនឡើងពីមួយឆ្នាំទៅមួយឆ្នាំ ៦.៨ ភាគរយនៃការនាំចូល និងការនាំចេញ ដែលតំណាងឱ្យ ៥៦.៩ ភាគរយនៃទំហំពាណិជ្ជកម្មសរុប កើនឡើង ២.៣ ភាគរយធៀបនឹងរយៈពេលដូចគ្នាកាលពីឆ្នាំមុន។
ទិន្នន័យចុងក្រោយរបស់ NBS បានបង្ហាញថា ការវិនិយោគទ្រព្យសកម្មថេររបស់ប្រទេសចិនបានកើនឡើង ៤ ភាគរយពីមួយឆ្នាំទៅមួយឆ្នាំក្នុងរយៈពេល ៤ ខែដំបូងនៃឆ្នាំ២០២៥ ដល់ ១៤.៧ ទ្រីលានយន់។ ដោយមិនរាប់បញ្ចូលវិស័យអចលនទ្រព្យ ការវិនិយោគទ្រព្យសកម្មថេររបស់ប្រទេសបានកើនឡើង ៨ ភាគរយពីមួយឆ្នាំទៅមួយឆ្នាំក្នុងអំឡុងពេលនេះ៕
ប្រែសម្រួល ឈូក បូរ៉ា
