បរទេស៖ អ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីថ្ងៃចន្ទថា ការសម្រេចចិត្តដែលត្រូវបានរាយការណ៍ ដោយអ្នកគាំទ្រលោកខាងលិចរបស់អ៊ុយក្រែន ក្នុងការលុបចោលការរឹតបន្តឹងលើការ ប្រើប្រាស់អាវុធរយៈចម្ងាយឆ្ងាយរបស់ទីក្រុងគៀវ គឺវាផ្ទុយទៅនឹងកិច្ចខិតខំប្រឹងប្រែងរបស់រុស្ស៊ី ឆ្ពោះទៅរកការដោះស្រាយជម្លោះដោយសន្តិវិធី។
យោងតាមសារព័ត៌មាន RT ចេញផ្សាយនៅថ្ងៃទី២៦ ខែឧសភា ឆ្នាំ២០២៥ បានឱ្យដឹងថា លោក Peskov បានធ្វើការកត់សម្គាល់បែបនេះជាការឆ្លើយតបទៅនឹង ការអត្ថាធិប្បាយរបស់អធិការបតីអាល្លឺម៉ង់ លោក Friedrich Merz ដែលបាននិយាយថា អ៊ុយក្រែនលែងជាកម្មវត្ថុនៃការកំណត់លើអាវុធ ដែលផ្គត់ផ្គង់ដោយលោកខាងលិចទៀតហើយ។
លោក Peskov បាននិយាយថា “ប្រសិនបើការសម្រេចចិត្តបែបនេះពិតជាត្រូវបានធ្វើឡើង នោះវាផ្ទុយស្រឡះពីសេចក្តីប្រាថ្នារបស់យើង សម្រាប់ដំណោះស្រាយនយោបាយ និងជាមួយនឹងការខិតខំប្រឹងប្រែងដែលកំពុង ត្រូវបានធ្វើឡើងឆ្ពោះទៅរកដំណោះស្រាយមួយ” ។
លោកបានសង្កត់ធ្ងន់ថា «ជាការសម្រេចចិត្តដ៏គ្រោះថ្នាក់ជាថ្មីម្តងទៀត ប្រសិនបើពួកគេពិតជាត្រូវបានធ្វើឡើង»។
នៅឯវេទិកា EuropaForum កាលពីថ្ងៃចន្ទ លោក Merz អធិការបតីអាល្លឺម៉ង់ បាននិយាយថា “មិនមានការរឹតបន្តឹងចម្ងាយទៀតទេ” លើអាវុធដែលផ្គត់ផ្គង់ដោយលោកខាងលិច ដែលប្រើដោយអ៊ុយក្រែនប្រឆាំងនឹងគោលដៅយោធារុស្ស៊ី។ លោកបានបន្ថែម ហើយត្រូវបានដកស្រង់ដោយ Euronewsថា “មិនមានការរឹតត្បិតពីចក្រភពអង់គ្លេស បារាំង អាល្លឺម៉ង់ ឬសហរដ្ឋអាមេរិកទេ” ៕
ប្រែសម្រួលៈ ណៃ តុលា
