បរទេស៖ ការចាប់ផ្តើម xAI របស់មហាសេដ្ឋីអាមេរិកលោក Elon Musk ដែលនឹងវិនិយោគក្នុងទំហំទឹកប្រាក់ ៣០០ លានដុល្លារ និងដាក់ពង្រាយ Grok AI chatbot របស់ខ្លួនក្នុងភាពជាដៃគូជាមួយកម្មវិធីផ្ញើសារ Telegram, នេះបើយោងតាមសេចក្តីថ្លែងការណ៍របស់នាយកប្រតិបត្តិរបស់ លោក Pavel Durov ដែលបានចេញផ្សាយកាលពីថ្ងៃពុធ។
យោងតាមសារព័ត៌មាន RT ចេញផ្សាយនៅថ្ងៃទី២៩ ខែឧសភា ឆ្នាំ២០២៥ បានឱ្យដឹងថា ក្នុងការប្រកាសពីកិច្ចព្រមព្រៀងនេះ លោក Durov បាននិយាយថា លោក និង លោក Elon Musk បានយល់ព្រមលើភាពជាដៃគូរយៈពេលមួយឆ្នាំ ដែលត្រូវបានរចនាឡើងដើម្បីពង្រឹងជំហរហិរញ្ញវត្ថុរបស់ Telegram ។
លោកបាននិយាយថា “យើងនឹងទទួលបានសាច់ប្រាក់ និងភាគហ៊ុនចំនួន ៣០០ លានដុល្លារពីកម្មវិធី xAI បូកនឹង ៥០ភាគរយ នៃប្រាក់ចំណូលពីការជាវ xAI ដែលបានលក់តាមរយៈ Telegram” ។
ក្រោយមក Elon Musk បាននិយាយនៅលើ X ថា “គ្មានកិច្ចព្រមព្រៀងណាមួយត្រូវបានចុះហត្ថលេខានោះទេ” ដោយលោកមិនផ្តល់ព័ត៌មានលម្អិតបន្ថែមណាមួយឡើយ ដោយជំរុញឱ្យលោក Durov បញ្ជាក់ឱ្យច្បាស់ថាភាគីទាំងពីរបានឈានដល់កិច្ចព្រមព្រៀងជាគោលការណ៍ ដោយទម្រង់បែបបទនៅតែត្រូវបញ្ចប់។
Telegram បាននិយាយថា Grok AI ត្រូវបានកំណត់ឱ្យបញ្ចូលទៅក្នុង Telegram ដោយអ្នកប្រើប្រាស់រំពឹងថា នឹងចាប់ផ្តើមចូលប្រើមុខងារដែលដំណើរការដោយ AI ចាប់ពីរដូវក្តៅនេះ។ អ្នកប្រើប្រាស់នឹងអាចធ្វើអន្តរកម្មជាមួយ Grok ដោយផ្ទាល់នៅក្នុងកម្មវិធី ដោយប្រើ chatbot ដែលភ្ជាប់មកជាមួយដើម្បីបង្កើតខ្លឹមសារ ឬចូលរួមក្នុងការសន្ទនាបើកចំហលើប្រធានបទដ៏ធំទូលាយមួយ។
សូមជម្រាបថា លោក Durov ស្ថាបនិករបស់ Telegram ដែលក្រុមហ៊ុនមានមូលដ្ឋាននៅទីក្រុងឌូបៃ ត្រូវបានចាប់ខ្លួននៅប្រទេសបារាំងក្នុងខែសីហា ឆ្នាំ ២០២៤ ហើយត្រូវបានចោទប្រកាន់ពីបទសមគំនិតក្នុងឧក្រិដ្ឋកម្មដែលត្រូវបានចោទប្រកាន់ដោយអ្នកប្រើប្រាស់ Telegram រួមទាំងភាពជ្រុលនិយម និងការរំលោភបំពានលើកុមារ។ ក្រោយមកលោកត្រូវបានដោះលែងដោយប្រាក់ធានាចំនួន ៥ លានអឺរ៉ូ (៥,៤៦ លានដុល្លារ)។ ទោះបីជាលោកត្រូវបានអនុញ្ញាតឱ្យធ្វើដំណើរទៅប្រទេស អេមីរ៉ាតអារ៉ាប់រួម ក្នុងខែមីនាក៏ដោយ សំណើថ្មីៗរបស់លោកដើម្បីទៅទស្សនកិច្ចនៅសហរដ្ឋអាមេរិកត្រូវបានបដិសេធ ហើយគាត់នៅតែស្ថិតក្រោមការត្រួតពិនិត្យកម្រិត៕
ប្រែប្រួលៈ ណៃ តុលា
