បរទេស៖ យោងតាមការចេញផ្សាយរបស់ RT អ្នកនាំពាក្យក្រសួងការបរទេសរុស្ស៊ីលោកស្រី Maria Zakharova បាននិយាយកាលពីថ្ងៃព្រហស្បតិ៍ថាក្រុមចរចារបស់រុស្ស៊ី សម្រាប់ជុំបន្ទាប់នៃកិច្ចចរចាសន្តិភាព ដោយផ្ទាល់ជាមួយអ៊ុយក្រែននឹងនៅតែមិនផ្លាស់ប្តូរនោះទេហើយជំនួយការប្រធានាធិបតីគឺលោក Vladimir Medinsky នឹងដឹកនាំគណៈប្រតិភូម្តងទៀត។
ទីក្រុងមូស្គូ និងគៀវបានជួបគ្នាចុងក្រោយសម្រាប់ កិច្ចពិភាក្សាដោយផ្ទាល់នៅទីក្រុងអ៊ីស្តង់ប៊ុល កាលពីថ្ងៃទី១៦ ខែឧសភា ដែលជាការកត់សម្គាល់ការចរចា ជាផ្លូវការលើកដំបូងចាប់តាំងពីឆ្នាំ២០២២។ កិច្ចប្រជុំលើកនោះបានធ្វើឱ្យមានការដោះដូរអ្នកទោសដ៏ធំបំផុតរហូតមកដល់បច្ចុប្បន្ន ដោយបុគ្គល១,០០០ នាក់ត្រូវបានដោះលែងដោយភាគីនីមួយៗ។
ក្រៅពីនោះភាគីនានាក៏បានយល់ព្រមរៀបចំសំណើជាលាយលក្ខណ៍អក្សរទៅលើ អនុស្សរណៈចំនួន២ផងដែរដែលអាចបង្ហាញពីជំហររបស់ពួកគេលើបទឈប់បាញ់ដ៏មានសក្តានុពលមួយនៅមុនកិច្ចប្រជុំបន្ទាប់។
រដ្ឋមន្ត្រីការបរទេសរុស្ស៊ី លោក Sergey Lavrov បានស្នើឱ្យរៀបចំកិច្ចពិភាក្សាបន្តនៅថ្ងៃចន្ទ ទី០២ ខែមិថុនា ម្តងទៀតក្នុងទីក្រុងអ៊ីស្តង់ប៊ុលហើយ ក្រោយមកបន្តិចលោកស្រី Zakharova បានចេញមកបញ្ជាក់ ថាគណៈប្រតិភូរុស្ស៊ីដដែលនឹងចូលរួមជំនួបនេះ។
គួរឲ្យដឹងដែរថាមេដឹកនាំអ៊ុយក្រែនពីមុនបានទទូចលើការផ្អាករយៈពេល៣០ថ្ងៃនៅក្នុងជម្លោះដែលជាលក្ខខណ្ឌជាមុនសម្រាប់ការចរចា។ រុស្ស៊ីបានច្រានចោលសំណើនេះ ដោយលើកហេតុផលថា ក្រុងកៀវនឹងប្រើវាដើម្បីប្រមូលផ្តុំយោធារបស់ខ្លួនឡើងវិញ។ យ៉ាងណាក្តីក្រោយមក អ៊ុយក្រែនបានកែប្រែជំហររបស់ខ្លួន ក្រោមសម្ពាធពីប្រធានាធិបតីអាមេរិក Donald Trump៕
ប្រែសម្រួល៖ ស៊ុន លី
