បរទេស៖ គណៈកម្មាធិការស៊ើបអង្កេតរុស្ស៊ីបាននិយាយថា សកម្មភាពថ្មីៗនៃការបំផ្លិចបំផ្លាញផ្លូវរថភ្លើង នៅក្នុងតំបន់ Bryansk និង Kursk របស់រុស្ស៊ីគឺជា “ការវាយប្រហារភេរវកម្ម” ដែលត្រូវបានគ្រោងទុកដោយអ៊ុយក្រែន ដើម្បីបណ្តាលឱ្យមានជនស៊ីវិល ស្លាប់ច្រើនបំផុត។
យោងតាមសារព័ត៌មាន RT ចេញផ្សាយនៅថ្ងៃទី៣ ខែមិថុនា ឆ្នាំ២០២៥ បានឱ្យដឹងថា ឧប្បត្តិហេតុទាំងពីរ បានកើតឡើងនៅល្ងាចថ្ងៃសៅរ៍ និងព្រឹកថ្ងៃអាទិត្យ ។ ក្នុងករណីទី១ គឺ ស្ពានមួយបានធ្លាក់នៅពីមុខរថភ្លើងដឹកអ្នកដំណើរ ដែលកំពុងធ្វើដំណើរក្នុងតំបន់ Bryansk ។ ឧប្បត្តិហេតុទីពីរបានកើតឡើង នៅក្នុងតំបន់ Kursk នៅពេលដែលស្ពានផ្លូវដែកមួយ បានបាក់រលំនៅក្រោមរថភ្លើង ដឹកទំនិញដែលកំពុងធ្វើដំណើរ។ ជាសរុបមនុស្ស ៧ នាក់បានស្លាប់ និង ១១៣ នាក់បានរងរបួស ។
នៅក្នុងសេចក្តីថ្លែងការណ៍មួយកាលពីថ្ងៃអង្គារ គណៈកម្មាធិការស៊ើបអង្កេតរុស្ស៊ីបាននិយាយថា ទីក្រុងម៉ូស្គូកំពុងចាត់ទុកសកម្មភាពបំផ្លិចបំផ្លាញទាំងពីរថា ជា “ការវាយប្រហារភេរវកម្ម”។
មុននេះ សារព័ត៌មានរុស្ស៊ី Kommersant បានរាយការណ៍ថា អ្នកស៊ើបអង្កេតជឿថា អ្នកប្រព្រឹត្ត គឺ ទំនងជាប្រើប្រាស់ឧបករណ៍បំផ្ទុះ C-4 ដែលផលិតដោយ សហរដ្ឋអាមេរិក។ គេរាយការណ៍ថា បានឈានដល់ការសន្និដ្ឋាននេះ បន្ទាប់ពីយកគ្រាប់បែកទម្ងន់១០គីឡូក្រាម ដែលមិនបានបំផ្ទុះមកពិនិត្យ ។
ការវាយប្រហារទាំងពីរបានកើតឡើង មិនយូរប៉ុន្មានមុនពេលកិច្ចចរចា ជុំទីពីររុស្ស៊ី-អ៊ុយក្រែននៅទីក្រុងអ៊ីស្តង់ប៊ុល និងចំពេលមានការកើនឡើង យ៉ាងខ្លាំងនៃការវាយឆ្មក់ ដោយយន្តហោះគ្មានមនុស្សបើករបស់ទីក្រុងគៀវ ចូលទៅក្នុងប្រទេសរុស្ស៊ី ដែលទីក្រុងម៉ូស្គូនិយាយថា មានគោលបំណងបង្អាក់ ដំណើរការសន្តិភាព ៕
ប្រែសម្រួលៈ ណៃ តុលា
Warning: Attempt to read property "term_id" on false in /var/www/dap-news.com/htdocs/wp-content/themes/flex-mag/functions.php on line 999
