អាមេរិក ដាក់បម្រាមគោចរ នៅកណ្តាលក្រុង Los Angeles បន្ទាប់ពីមានកុប្បកម្ម និងការលួចប្លន់

បរទេស៖ បម្រាមគោចរត្រូវបានដាក់ នៅកណ្តាលក្រុង Los Angeles បន្ទាប់ពីមានកុប្បកម្ម និងការលួចប្លន់ជាច្រើនថ្ងៃ ដែលបង្កឡើងដោយការវាយឆ្មក់ បង្ក្រាបទៅលើជនអន្តោប្រវេសន៍។

យោងតាមសារព័ត៌មាន RT ចេញផ្សាយនៅថ្ងៃទី១១ ខែមិថុនា ឆ្នាំ២០២៥ បានឱ្យដឹងអភិបាលក្រុង Los Angeles គឺលោកស្រី Karen Bass បានប្រកាសកាលពីថ្ងៃអង្គារ ថា ការរឹតបន្តឹងនឹងចូលជាធរមានចាប់ពីម៉ោង ៨ យប់ ដល់ម៉ោង ៦ ព្រឹក ម៉ោងក្នុងស្រុក ។ ប៉ូលិសនឹងចាប់ខ្លួនជនណា ដែលបំពានបម្រាមគោចរ ដែលត្រូវបានគេរំពឹងថា បម្រាមគោចរនេះនឹងនៅមាន រយៈពេលជាច្រើនថ្ងៃ។

លោកស្រី Karen Bass បាននិយាយថា ការសម្រេចចិត្តនេះ បានកើតឡើងបន្ទាប់ពី “ឧប្បតិ្តហេតុ” គឺត្រូវបានឈាន ដល់ដោយកត់សម្គាល់ថា អាជីវកម្មចំនួន ២៣ ត្រូវបានលួចកាលពីយប់មុន។

បម្រាមគោចរគ្របដណ្តប់ប្រហែលមួយម៉ាយការ៉េ ដែលមានព្រំប្រទល់ជាប់ដោយផ្លូវ 5 Freeway, 110 Freeway និង 10 Freeway រហូតដល់កន្លែងដែលវាបញ្ចូលគ្នាជាមួយ 110 និង 5 , នេះបើយោងតាម ការចេញផ្សាយរបស់ NBC Los Angeles ។

ប្រធានប៉ូលីសនៅទីក្រុង Los Angeles លោក Jim McDonnell បាននិយាយថា អ្នករស់នៅក្នុងតំបន់នឹងត្រូវបានលើកលែង រួមជាមួយនឹងបុគ្គលិកសង្គ្រោះបន្ទាន់ និងសុវត្ថិភាព អ្នកកាសែត និងបុគ្គលអនាថា។

លោកបានមានប្រសាសន៍ថា “បម្រាមគោចរគឺជាវិធានការ ចាំបាច់ដើម្បីការពារអាយុជីវិត និងការពារទ្រព្យសម្បត្តិ បន្ទាប់ពីមានចលាចលកើនឡើង ជាច្រើនថ្ងៃជាប់ៗគ្នានៅទូទាំងទីក្រុង”។

សូមជម្រាបថា កុប្បកម្មបានផ្ទុះឡើង កាលពីយប់ថ្ងៃសុក្រ បន្ទាប់ពីភ្នាក់ងារសហព័ន្ធ បានឃុំខ្លួនបុគ្គលមួយចំនួន ក្នុងអំឡុងពេលការបង្ក្រាបពីសំណាក់ប្រធានាធិបតី Donald Trump លើជនអន្តោប្រវេសន៍ខុសច្បាប់ ។ រហូតមកដល់ពេលនេះ មនុស្សជាង ៣៥០ នាក់ត្រូវបានចាប់ខ្លួន ក្នុងនោះមាន ១៩៧ នាក់ ចាប់ខ្លួនកាលពីថ្ងៃអង្គារ។ រូបភាពពីលើអាកាសពី ឧទ្ធម្ភាគចក្រព័ត៌មាន បង្ហាញហ្វូងមនុស្ស នៅតែប្រមូលផ្តុំគ្នានៅតាមដងផ្លូវ៕

ប្រែសម្រួលៈ ណៃ តុលា