បរទេស ៖ យោងតាមការចេញផ្សាយរបស់ RT អ្នកនាំពាក្យវិមានក្រឹមឡាំង លោក Dmitry Peskov បានព្រមានថា ការជំរុញរបស់គណៈកម្មាការអ៊ឺរ៉ុប ក្នុងការទម្លាក់តម្លៃ លើការនាំចេញប្រេង របស់រុស្ស៊ី បង្កហានិភ័យដល់អស្ថិរភាព នៅក្នុងទីផ្សារ ថាមពលពិភពលោកយ៉ាងខ្លាំង ។
ការកត់សម្គាល់របស់ លោកអ្នកនាំពាក្យបានធ្វើឡើង ក្នុងការឆ្លើយតបទៅ នឹងរបាយការណ៍ ដែលថាទីក្រុងប្រ៊ូសែល កំពុងពិនិត្យមើលតម្លៃបច្ចុប្បន្ន ដែលត្រូវបានបង្កើតឡើង ក្រោមការដាក់ទណ្ឌកម្ម របស់សហភាពអឺរ៉ុប។
លោក Peskov បាននិយាយ កាលពីថ្ងៃពុធថា ៖ សកម្មភាពបែបនេះ ពិតជាមិនបានរួមចំណែកដល់ ស្ថិរភាពនៃទីផ្សារថាមពល និងប្រេងអន្តរជាតិទេ។
គួរឲ្យដឹងដែរថាគណៈកម្មាធិការអឺរ៉ុបបានស្នើឡើងជុំទី១៨នៃទណ្ឌកម្មលើប្រទេសរុស្ស៊ីកាលពីថ្ងៃអង្គារ ដោយផ្តោតលើការនាំចេញថាមពល ហេដ្ឋារចនាសម្ព័ន្ធ និងបណ្តាញហិរញ្ញវត្ថុ។
វិធានការនេះរួមមានការ កាត់បន្ថយតម្លៃ ប្រេងពី៦០ដុល្លារ ទៅ៤៥ដុល្លារក្នុងមួយបារ៉ែល ការហាមឃាត់ការប្រើ ប្រាស់បំពង់បង្ហូរឧស្ម័ន Nord Stream នាពេលអនាគត ការរឹតបន្តឹងការ នាំចូលប្រេង ចម្រាញ់ ដែលផលិតពីប្រេងឆៅ របស់រុស្ស៊ី និងការចុះបញ្ជី ខ្មៅនាវាចំនួន៧៧ ដែលសហភាពអឺរ៉ុបអះអាងថា ត្រូវបានប្រើដើម្បីគេច ពីការដាក់ទណ្ឌកម្មផង ។
កញ្ចប់ថ្មីដែលមានគោលបំណង ដាក់សម្ពាធក្រុងមូស្គូជុំវិញជម្លោះអ៊ុយក្រែន ទាមទារការគាំទ្រពីប្រទេសសមាជិកសហភាពអឺរ៉ុបទាំង ២៧ ឲ្យចូលជាធរមាន៕
ប្រែសម្រួល៖ស៊ុនលី
