ប្រទេសកូរ៉េខាងត្បូង នឹងផ្តល់លុយឱ្យប្រជាជន ដើម្បីបង្កើនការចំណាយក្នុងស្រុក និងធ្វើឱ្យសេដ្ឋកិច្ចងើបឡើងវិញ

បរទេស៖ សារព័ត៌មាន Korea Herald បានរាយការណ៍ថា ប្រទេសកូរ៉េខាងត្បូងកំពុងចាប់ផ្តើមកម្មវិធី ផ្តល់សាច់ប្រាក់យ៉ាងទូលំទូលាយ ដោយផ្តល់ជូននូវអ្វីដែលក្រុមមន្ត្រីបានពិពណ៌នាថាជា “ប័ណ្ណប្រើប្រាស់” ដើម្បីបង្កើនការចំណាយក្នុងស្រុក និងធ្វើឱ្យសេដ្ឋកិច្ចដែលធ្លាក់ចុះរបស់ប្រទេសនេះងើបឡើងវិញ។

យោងតាមសារព័ត៌មាន RT ចេញកាលពីថ្ងៃទី៦ ខែកក្កដា ឆ្នាំ២០២៥ បានឱ្យដឹងថា គំនិតផ្តួចផ្តើមនេះគឺជាផ្នែកមួយនៃថវិកាបន្ថែមចំនួន 31.8 ពាន់ពាន់លានវ៉ុន ស្មើនឹងប្រហែល 23.3 ពាន់លានដុល្លារ ដែលអនុម័តដោយរដ្ឋសភាកាលពីថ្ងៃសុក្រ។ កម្មវិធីនេះគ្រោងនឹងចាប់ផ្តើមនៅថ្ងៃទី ២១ ខែកក្កដា ហើយដំណើរការរហូតដល់ថ្ងៃទី ១២ ខែកញ្ញា។

អនុរដ្ឋមន្ត្រីមហាផ្ទៃរបស់កូរ៉េខាងត្បូង លោក  Kim Min-jae ដែលដឹកនាំក្រុមការងារអន្តរកម្មដែលត្រួតពិនិត្យគំនិតផ្តួចផ្តើមនេះ បាននិយាយថា “យើងនឹងធានាឱ្យបាននូវការរៀបចំឱ្យបានហ្មត់ចត់ សម្រាប់ការដាក់ឱ្យដំណើរការនៃការទូទាត់ទាំងនេះ ដូច្នេះពួកគេអាចបម្រើជាកាតាលីករសម្រាប់ការងើបឡើងវិញ នៃសេដ្ឋកិច្ចដោយការជំរុញការប្រើប្រាស់ និងគាំទ្រដល់អ្នកដែលត្រូវការ” ។

ប្រជាពលរដ្ឋទាំងអស់ដែលរស់នៅ ក្នុងប្រទេសកូរ៉េខាងត្បូង គិតត្រឹមថ្ងៃទី១៨ ខែមិថុនា នឹងទទួលបានការទូទាត់ម្តងចំនួន 150.000 វ៉ុន ស្មើនឹង 110 ដុល្លារ។ ការទូទាត់នឹងធ្វើឡើងតាមរយៈប័ណ្ណឥណទាន ឬឥណទាន កាតបង់ប្រាក់ជាមុន ឬវិញ្ញាបនបត្រអំណោយដែលចេញដោយរដ្ឋាភិបាលក្នុងតំបន់។

ជំនួយបន្ថែមនឹងកំណត់គោលដៅក្រុមដែលងាយរងគ្រោះ, គ្រួសារដែលមានភាពក្រីក្រ និងគ្រួសារដែលមានតែឪពុក មានតែម្តាយ នឹងទទួលបានប្រាក់ 300,000 វ៉ុន ឬស្មើនឹង 220 ដុល្លារ ហើយអ្នកទទួលប្រាក់ឧបត្ថម្ភសម្រាប់ការរស់នៅជាមូលដ្ឋាននឹងទទួលបាន 400,000 វ៉ុន ឬស្មើនឹង 290 ដុល្លារ។ អ្នករស់នៅក្នុងតំបន់ជនបទនឹងទទួលបានប្រាក់បន្ថែមចំនួន 50.000 វ៉ុន ដើម្បីលើកកម្ពស់ “ការអភិវឌ្ឍន៍តំបន់ប្រកបដោយតុល្យភាព” នេះបើយោងតាមក្រសួងមហាផ្ទៃ។

ការទូទាត់ជុំទីពីរដែលបានគ្រោងទុកសម្រាប់ថ្ងៃទី២២ ខែកញ្ញា ដល់ថ្ងៃទី ៣១ ខែតុលា នឹងផ្តល់ 100.000 វ៉ុន ឬស្មើនឹង 73 ដុល្លារ ដល់ទាបបំផុត 90% នៃអ្នកដែលរកប្រាក់។ សិទ្ធិទទួលបាននឹងត្រូវបានកំណត់ដោយផ្អែកលើ បុព្វលាភធានារ៉ាប់រងសុខភាពជាតិ ជាមួយនឹងព័ត៌មានលម្អិតនឹងត្រូវប្រកាសនៅក្នុងខែកញ្ញា ៕

ប្រែសម្រួលៈ ណៃ តុលា