បរទេស៖ ទីបញ្ជាការការពារដែនអាកាសអាមេរិកខាងជើង (NORAD) បានបញ្ជាក់ថា យន្តហោះចម្បាំង F-16 មួយគ្រឿង បានហោះស្ទាក់យន្តហោះស៊ីវិល ដែលបានរំលោភលើដែនអាកាស ដែលបានដាក់កំហិតលើក្លឹបវាយកូនហ្គោល របស់ប្រធានាធិបតីអាមេរិក លោក Donald Trump នៅ Bedminster រដ្ឋ New Jersey កាលពីថ្ងៃសៅរ៍ ។
យោងតាមសារព័ត៌មាន RT ចេញផ្សាយនៅថ្ងៃទី៦ ខែកក្កដា ឆ្នាំ២០២៥ បានឱ្យដឹងថា ឧបទ្ទវហេតុនេះបានកើតឡើងនៅម៉ោងប្រហែល 2 និង 39 នាទីរសៀលម៉ោងក្នុងស្រុក នៅពេលដែលយន្តហោះអាកាសចរណ៍ទូទៅមួយគ្រឿង បានចូលទៅក្នុងតំបន់ហាមឃាត់ការហោះហើរបណ្តោះអាសន្ន (TFR) ដែលត្រូវបានដាក់ចេញ ដោយសារតែវត្តមានរបស់លោក Trump នៅក្នុងតំបន់នោះ។ NORAD បានបញ្ចេញយន្តហោះចម្បាំង F-16 ដើម្បីប្រាប់អ្នកបើកយន្តហោះ និងនាំយន្តហោះនោះចេញពីតំបន់ហាមឃាត់ដោយសុវត្ថិភាព។
ការស្ទាក់ចាប់នេះ គឺជាផ្នែកមួយ នៃការឆ្លើយតបការដាស់តឿនដ៏ទូលំទូលាយមួយ ខណៈដែលថ្ងៃសៅរ៍បានឃើញការបំពាន លើតំបន់ហាមឃាត់ការ ហោះហើរបណ្តោះអាសន្ន សរុបចំនួនប្រាំដាច់ដោយឡែកពីគ្នានៅក្នុងតំបន់ Bedminster – រួមទាំង បីទៀត មុនពេលឧបទ្ទវហេតុបំពាន និងមួយទៀតនៅថ្ងៃបន្ទាប់។ NORAD មិនបានបញ្ចេញព័ត៌មានលម្អិតបន្ថែមអំពីយន្តហោះ ឬអ្នកបើកបរដែលពាក់ព័ន្ធនោះទេ៕
ប្រែសម្រួលៈ ណៃ តុលា
