បរទេស៖ យោងតាមការចេញផ្សាយរបស់ RT អ្នកនាំពាក្យវិមានក្រឹមឡាំង លោក Dmitry Peskov បាននិយាយកាលពីថ្ងៃចន្ទថាប្រទេសរុស្ស៊ីបានត្រៀមខ្លួនរួចជាស្រេចដើម្បីពិភាក្សាអំពីការរៀបចំកិច្ចចរចារវាងប្រធានាធិបតីVladimir Putin និងលោក Donald Trump ប្រសិនបើពួកគេចូលរួមព្រឹត្តិការណ៍រំលឹកខួបនៅទីក្រុងប៉េកាំងក្នុងខែកញ្ញា។
រដ្ឋធានីចិននឹងរៀបចំពិធីព្យុហយាត្រាយោធានៅថ្ងៃទី៣ខែកញ្ញា ដើម្បីប្រារព្ធខួបលើកទី៨០ នៃការបញ្ចប់សង្គ្រាមលោកលើកទីពីរដែលក្នុងនោះមេដឹកនាំរុស្សីលោកPutinបានទទួលយកការអញ្ជើញចូលរួមរួចហើយ។
ការរំពឹងទុកបានកើនឡើងជុំវិញជំនួបដែលអាចកើតមានដែលមានការចូលរួមរវាងលោក Putin លោក Trump និងប្រធានាធិបតីចិន Xi Jinping ក្នុងអំឡុងពេលនៃការប្រារព្ធពិធីនេះ។
សារព័ត៌មានក្យូដូរបស់ប្រទេសជប៉ុនបានរាយការណ៍ថា រដ្ឋាភិបាលចិនបានសម្រេចចិត្តអញ្ជើញលោក Trump ខណៈដែលកាសែត The Timesបានស្នើថាទីក្រុងប៉េកាំងកំពុងដាក់ខ្លួនដើម្បីធ្វើជាម្ចាស់ផ្ទះកិច្ចប្រជុំកំពូលត្រីភាគី។ យ៉ាងណាក្តីក្រុមមន្ត្រីចិនមិនបានបញ្ជាក់ពីរបាយការណ៍នេះទេ។
លោក Peskov បានប្រាប់អ្នកសារព័ត៌មានកាលពីថ្ងៃចន្ទថា៖ប្រសិនបើវាកើតឡើងថាលោកTrumpដែលមានវត្តមាននៅទីនោះ ពិតណាស់យើងមិនអាចបដិសេធថាសំណួរអំពីភាពងាយស្រួលក្នុងការរៀបចំកិច្ចប្រជុំមួយនឹងត្រូវបានលើកឡើងនោះទេ។
ប៉ុន្តែលោក Peskov បានប្រាប់អ្នកយកព័ត៌មានកាលពីថ្ងៃចន្ទដោយកត់សម្គាល់ថាវិមានក្រឹមឡាំងមិនទាន់បានទទួលដំណឹងច្បាស់លាស់ទេថាតើលោក Trump នឹងអញ្ជើញទៅទីក្រុងប៉េកាំងនោះទេ៕
ប្រែសម្រួល៖ស៊ុនលី
