អ៊ីរ៉ង់ និងមហាអំណាចអឺរ៉ុប នឹងបន្តកិច្ចចរចា នុយក្លេអ៊ែរឡើងវិញ មុនពេលកំណត់នៃទណ្ឌកម្ម
តេហេរ៉ង់៖ ក្រសួងការបរទេសអ៊ីរ៉ង់ បានឲ្យដឹងថា មហាអំណាចអ៊ីរ៉ង់ និងអឺរ៉ុប នឹង បន្តកិច្ចពិភាក្សា ស្តីពីកម្មវិធីនុយក្លេអ៊ែរ និងការបន្ធូរបន្ថយទណ្ឌកម្ម របស់ទីក្រុងតេអេរ៉ង់ នៅថ្ងៃអង្គារសប្ដាហ៍ក្រោយ ប៉ុន្មានថ្ងៃមុនថ្ងៃកំណត់ ដែលកំណត់ដោយបារាំង អង់គ្លេស និងអាល្លឺម៉ង់ ដើម្បីជំរុញយន្តការ ដាក់ទណ្ឌកម្ម ។
ក្រសួងបានឲ្យដឹងថា ការសម្រេចចិត្តនេះបានធ្វើឡើងតាមទូរស័ព្ទរួមគ្នាកាលពីថ្ងៃសុក្ររវាងរដ្ឋមន្ត្រីការបរទេសអ៊ីរ៉ង់លោក Seyed Abbas Araghchi រដ្ឋមន្ត្រីការបរទេសបារាំង អាល្លឺម៉ង់ និង អង់គ្លេស – Jean-Noel Barrot, Johann Wadephul និង David Lammy និងប្រធានគោលនយោបាយការ បរទេសសហភាពអឺរ៉ុបលោកស្រី Kaja Kallas ។ កិច្ចប្រជុំនេះ នឹងធ្វើឡើងនៅថ្នាក់អនុរដ្ឋមន្ត្រីការបរទេស។
ឃ្លា “snapback” ដែលជាផ្នែកមួយ នៃផែនការសកម្មភាពទូលំទូលាយរួមឆ្នាំ២០១៥ ឬហៅកាត់ថា (JCPOA) អនុញ្ញាតឱ្យមហាអំណាច ពិភពលោកដាក់ទណ្ឌកម្មអន្តរជាតិឡើងវិញ ប្រសិនបើអ៊ីរ៉ង់ មិនគោរពតាមកិច្ចព្រមព្រៀងនោះ។
លោក Araghchi បានលេីកឡេីងថា រដ្ឋអឺរ៉ុបទាំងបីខ្វះសិទ្ធិអំណាចក្នុងការស្ដារយន្តការនេះ ហើយបានព្រមានអំពីផលវិបាក ប្រសិនបើទណ្ឌកម្មត្រូវបានស្តារឡើងវិញ។
រដ្ឋមន្ត្រីការបរទេសបារាំង លោក Barrot បានបញ្ជាក់ពីកិច្ចពិភាក្សានេះ នៅក្នុងសារបង្ហោះ X ដោយថា លោកបាននិយាយជាមួយសមភាគីអាល្លឺម៉ង់ និងអង់គ្លេស ព្រមទាំងលោកស្រី Kallas របស់អឺរ៉ុប និងលោក Araghchi របស់អ៊ីរ៉ង់ អំពីកម្មវិធីនុយក្លេអ៊ែរ និង “ទណ្ឌកម្មប្រឆាំងនឹងអ៊ីរ៉ង់ ដែលកំពុងរៀបចំអនុវត្តឡើងវិញ”៕
ប្រែសម្រួល ឈូក បូរ៉ា
