ការផលិតរថយន្ត របស់ប្រទេសថៃ ធ្លាក់ចុះ ១១.៣៩ ភាគរយ នៅក្នុងខែកក្កដា
បាងកក៖ ទិន្នន័យពីសហព័ន្ធឧស្សាហកម្មថៃ (FTI) បានបង្ហាញកាលពីថ្ងៃចន្ទថា ផលិតកម្មរថយន្តរបស់ប្រទេសថៃបានធ្លាក់ចុះជាលើកដំបូងក្នុងរយៈពេលបីខែ នៅក្នុងខែកក្កដា ដោយសារភាពមិនប្រាកដប្រជានៃពាណិជ្ជកម្មសកលបានរារាំងការនាំចេញ។
ក្រុមហ៊ុនផលិតរថយន្តថៃបានផលិតរថយន្តចំនួន ១១០,៦១៦គ្រឿងកាលពីខែមុន ធ្លាក់ចុះ ១១,៣៩ភាគរយធៀបនឹងឆ្នាំមុន ហើយផ្ទុយពីការកើនឡើង ១១,៩៨ភាគរយនៅក្នុងខែមិថុនា នេះបើយោងតាម FTI ។
លោក Surapong Paisitpattanapong អ្នកនាំពាក្យ FTI Automotive Industry Club បានឧ្យដឹងថា ការធ្លាក់ចុះនេះគួរឱ្យកត់សម្គាល់ ចំពោះរថយន្តដឹកអ្នកដំណើរដែលប្រើសាំង ដែលបានធ្លាក់ចុះ ៣១,៨ ភាគរយពីមួយឆ្នាំទៅមួយឆ្នាំ ដែលមួយផ្នែកមកពីការបញ្ឈប់ម៉ូដែលនាំចេញមួយចំនួន។
លោក Surapong បានប្រាប់សន្និសីទសារព័ត៌មានមួយថា ទោះជាយ៉ាងណាក៏ដោយ រថយន្តអគ្គិសនីសុទ្ធ (EVs) បានឃើញការកើនឡើងច្រើនជាង ៥ដង ខណៈដែលក្រុមហ៊ុនផលិតរថយន្តបានបង្កើនការផលិតរបស់ពួកគេដោយសារតែការកាត់បន្ថយពន្ធ និងការឧបត្ថម្ភធនរបស់រដ្ឋាភិបាល។
លោក Surapong បានបន្ដថាសម្រាប់រយៈពេលប្រាំពីរខែដំបូងនៃឆ្នាំ២០២៥ការផលិតរថយន្តបានធ្លាក់ចុះ ៥,៧៣ភាគរយធៀបនឹងឆ្នាំមុនមកនៅត្រឹម ៨៣៥,៣៣១ គ្រឿង បើទោះបីជាមានការពង្រីកយ៉ាងខ្លាំង សម្រាប់ទាំងអាគុយ និងរថយន្ត plug-in hybrid EVs ក៏ដោយ៕
ប្រែសម្រួលឈូក បូរ៉ា
