អ៊ុយក្រែន បញ្ជាក់ថា រុស្ស៊ីវាយប្រហារហេដ្ឋា រចនាសម្ព័ន្ធថាមពល របស់ខ្លួន ក្នុងតំបន់ចំនួន ៦
គៀវ៖ ក្រសួងថាមពលអ៊ុយក្រែន បានឲ្យដឹងនៅក្នុងសេចក្តីថ្លែងការណ៍មួយថា ប្រទេសរុស្ស៊ី បានបើកការវាយប្រហារ ដោយយន្តហោះគ្មានមនុស្សបើកលើហេដ្ឋារចនាសម្ព័ន្ធ ថាមពលរបស់ប្រទេសអ៊ុយក្រែន រួមទាំងកន្លែងដឹកជញ្ជូនឧស្ម័ន នៅក្នុងតំបន់ចំនួន៦ កាលពីយប់ថ្ងៃពុធ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
ការវាយប្រហារបានផ្តោតលើតំបន់ Chernihiv និង Sumy ខាងជើង តំបន់ Kharkiv និងតំបន់ Donetsk ភាគខាងកើត ក៏ដូចជាតំបន់ Zaporizhzhia ភាគខាងត្បូង និងតំបន់ Poltava ភាគកណ្តាល។ យោងតាមសេចក្តីថ្លែងការណ៍បានឱ្យដឹងថា ហេដ្ឋារចនាសម្ព័ន្ធដឹកជញ្ជូនឧស្ម័ននៅក្នុងតំបន់ Poltava បានរងការខូចខាតយ៉ាងសំខាន់។
ទន្ទឹមនឹងនេះ កងទ័ពអាកាសអ៊ុយក្រែនបានឲ្យដឹងថា ខ្លួនបានស្ទាក់ចាប់យន្តហោះគ្មានមនុស្សបើកចំនួន ៧៤ គ្រឿង ក្នុងចំណោមយន្តហោះគ្មានមនុស្សបើកចំនួន ៩៥ គ្រឿង ដែលរុស្ស៊ីបានបាញ់បង្ហោះ ខណៈយន្តហោះគ្មានមនុស្សបើកចំនួន ២១ គ្រឿងបានវាយប្រហារទីតាំងចំនួន ៩ ៕
ប្រែសម្រួល ឈូក បូរ៉ា
