សម្ព័ន្ធភាពរវាងអ៊ីរ៉ង់-រុស្ស៊ី បានផ្ទុះឡើង ខណៈដែលមានមន្រ្តី ចេញមកចោទប្រកាន់ ទីក្រុងម៉ូស្គូថា បានជួយអ៊ីស្រាអែល
បរទេស ៖ ការចោទប្រកាន់របស់មន្ត្រីអ៊ីរ៉ង់ម្នាក់ ដែលបង្ហាញ ពីទំនាក់ទំនង របស់រុស្ស៊ីជាមួយអ៊ីស្រាអែល ក្នុងការវាយប្រហារលើ អ៊ីរ៉ង់ បានបង្កឱ្យមានការជជែកវែកញែក អំពីតម្លៃនៃភាពជាដៃគូ យុទ្ធសាស្ត្រដ៏យូរលង់របស់អ៊ីរ៉ង់ ជាមួយរុស្ស៊ី។
យោងតាមគេហទំព័រ Iran International ចេញផ្សាយនៅថ្ងៃទី២៨ ខែសីហា ឆ្នាំ២០២៥ បានឱ្យដឹងថា លោក Mohammad Sadr សមាជិកក្រុមប្រឹក្សា Expediency របស់អ៊ីរ៉ង់ ដែលត្រូវបានតែងតាំងដោយមេដឹកនាំកំពូល Ali Khamenei បានលើកឡើងថា រុស្ស៊ីអាចនឹងផ្តល់ឱ្យអ៊ីស្រាអែលនូវព័ត៌មាន សម្ងាត់ការពារដែនអាកាស របស់អ៊ីរ៉ង់ពីជម្លោះពីមុន រួមទាំងការវាយប្រហាររបស់អ៊ីស្រាអែល ដែលមានកម្រិតក្នុងខែវិច្ឆិកា ឆ្នាំ ២០២៤ ។
យោងតាមលោក Sadr នេះអាចអនុញ្ញាតឱ្យ អ៊ីស្រាអែលកំណត់ គោលដៅយ៉ាងជាក់លាក់ នូវទីតាំងការពាររបស់អ៊ីរ៉ង់ ក្នុងអំឡុងពេលសង្រ្គាមរយៈពេល ១២ ថ្ងៃនៅក្នុងខែមិថុនា។ លោកបាននិយាយនៅក្នុងបទសម្ភាសន៍មួយ ដែលត្រូវបានចេញផ្សាយ កាលពីថ្ងៃអាទិត្យដោយគេហទំព័រអនឡាញ Seenergy ដែលជាប៉ុស្តិ៍ podcast ឧទ្ទិសដល់គោលនយោបាយការបរទេស និងបញ្ហាថាមពល។
លោក Mohammad Sadr បាននិយាយថា “ខ្ញុំកំពុងប្រាប់អ្នកតាមការវិភាគថា រុស្សីបានផ្តល់លក្ខណៈ ជាក់លាក់ដល់អ៊ីស្រាអែល” ប៉ុន្តែលោកថា លោកក៏មានព័ត៌មានអំពីបញ្ហានេះផងដែរ៕
ប្រែសម្រួលៈ ណៃ តុលា
