ភាពតានតឹង រវាងសហរដ្ឋអាមេរិក និងវេណេហ្ស៊ុយអេឡា កំពុងតែកើនឡើង ក្នុងពេលនាវាចម្បាំង និងនាវាមុជទឹកអាមេរិកមកដល់តំបន់ ការាបៀនភាគខាងត្បូង និងដែនទឹកក្បែរនោះ
បរទេស៖ ភាពតានតឹង រវាងសហរដ្ឋអាមេរិក និងវេណេហ្ស៊ុយអេឡា កំពុងតែកើនឡើង ចំពេលមានការ កសាងកងទ័ពជើងទឹក របស់អាមេរិកដ៏ធំ មួយនៅតំបន់ ការាបៀនភាគខាងត្បូង និងដែនទឹកក្បែរនោះ ដែលមន្ត្រីអាមេរិក និយាយថា មានគោលបំណងដោះស្រាយការគំរាមកំហែងពីក្រុមជួញដូរគ្រឿង ញៀនអាមេរិកឡាទីន។
យោងតាមសារព័ត៌មាន Reuters ចេញផ្សាយនៅថ្ងៃទី២៩ ខែសីហា ឆ្នាំ២០២៥ បានឱ្យដឹងថា ប្រធានាធិបតីអាមេរិក លោក ដូណាល់ ត្រាំ បានចាត់ទុកការបង្រ្កាបក្រុមជួញដូរគ្រឿងញៀន ជាគោលដៅស្នូលនៃរដ្ឋបាលរបស់លោក ដែលជាផ្នែកនៃកិច្ចខិតខំប្រឹងប្រែងកាន់តែទូលំទូលាយក្នុងការកំណត់ការធ្វើចំណាកស្រុក និងធានាសុវត្ថិភាពព្រំដែនភាគខាងត្បូងសហរដ្ឋអាមេរិក។
ខណៈពេលដែលនាវាឆ្មាំឆ្នេរសមុទ្រ និងកងទ័ពជើងទឹក សហរដ្ឋអាមេរិក ប្រតិបត្តិការជាទៀងទាត់ នៅក្នុងតំបន់ការាបៀនភាគខាងត្បូង ការសាងសង់កម្លាំងទ័ពនេះ គឺមានទំហំធំជាងការដាក់ ពង្រាយធម្មតានៅក្នុងតំបន់។
មន្ត្រីអាមេរិកម្នាក់ ដែលនិយាយក្នុងលក្ខខណ្ឌមិនបញ្ចេញឈ្មោះបាននិយាយកាលពីថ្ងៃព្រហស្បតិ៍ថា នាវាចម្បាំងអាមេរិក ចំនួន ៧ គ្រឿង រួមជាមួយនឹងនាវាមុជទឹកវាយប្រហារលឿន ដែលដើរដោយថាមពលនុយក្លេអែរ គឺស្ថិតនៅក្នុងតំបន់ ឬត្រូវបានគេរំពឹងថានឹងមានវត្តមាន នៅក្នុងសប្តាហ៍ខាងមុខនេះ។
ចំណែកប្រធានាធិបតីវេណេស៊ុយអេឡា លោក Nicolas Maduro បានថ្កោលទោសទង្វើនេះផងដែរ៕
ប្រែសម្រួលៈ ណៃ តុលា
