ប្រធានការិយាល័យមជ្ឈិមបក្សរបស់វៀតណាម លោក Le Hoai Trung ក្លាយជារដ្ឋមន្ត្រីស្តីទីក្រសួងការបរទេស
ប្រែសម្រួលៈ ណៃ តុលា
បរទេស៖ ក្នុងការផ្លាស់ប្តូរដ៏គួរឱ្យភ្ញាក់ផ្អើលមួយ នាព្រឹកថ្ងៃទី៣០ ខែសីហា នាយករដ្ឋមន្ត្រី វៀតណាម លោក Pham Minh Chinh បានប្រគល់សេចក្តីសម្រេចទទួលយកលោក Le Hoai Trung ពីការិយាល័យមជ្ឈិមបក្ស មកបម្រើការងារនៅក្រសួងការបរទេស ដោយកាន់តំណែងជារដ្ឋមន្ត្រីស្តីទី។
សារព័ត៌មាន BBC News ចេញផ្សាយកាលពីថ្ងៃទី៣០ ខែសីហា ឆ្នាំ២០២៥ បានឱ្យដឹងថា ទន្ទឹមនឹងនោះ គណៈកម្មាធិការអចិន្ត្រៃយ៍នៃគណៈកម្មាធិការបក្សរដ្ឋាភិបាលក៏បានសម្រេចតែងតាំងលោក Le Hoai Trung ឱ្យចូលជាសមាជិកគណៈកម្មាធិការប្រតិបត្តិ គណៈកម្មាធិការអចិន្ត្រៃយ៍ និងកាន់តំណែងជាលេខាគណៈកម្មាធិការបក្សនៃក្រសួងការបរទេសសម្រាប់អាណត្តិ ២០២៥-២០៣០។
ជាមួយនឹងការសម្រេចចិត្តនេះ លោក Trung ចូលកាន់តំណែងថ្មីជំនួសលោក Bui Thanh Son ដែលបានកាន់តំណែងជាឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសតាំងពីខែសីហា ឆ្នាំ២០២៤។
កន្លងមក លោកប្រធានាធិបតី Luong Cuong បានសម្រេចព្យួរលោក Son ពីតំណែងជារដ្ឋមន្ត្រីជាបណ្ដោះអាសន្ន រហូតដល់រដ្ឋសភានីតិកាលទី ១៥ បណ្តេញលោកចេញពីតំណែងជារដ្ឋមន្ត្រីក្រសួងការបរទេស នេះបើយោងតាមគេហទំព័រព័ត៌មានអេឡិចត្រូនិករបស់រដ្ឋាភិបាល។
