ប៉េកាំង៖ អ្នកនាំពាក្យក្រសួងការបរទេសចិន លោក Guo Jiakun បានឲ្យដឹងថា សហរដ្ឋអាមេរិក និងប្រទេសជប៉ុន គួរតែគោរពចំពោះការព្រួយបារម្ភផ្នែកសន្តិសុខរបស់ប្រទេសដទៃទៀត ចៀសវាងការដាក់ពង្រាយប្រព័ន្ធមីស៊ីល Typhon និងរួមចំណែកដល់សន្តិភាព និងស្ថិរភាពក្នុងតំបន់ ជាមួយនឹងសកម្មភាពជាក់ស្តែង។
លោក Guo បានធ្វើការកត់សម្គាល់នៅក្នុងសន្និសីទសារព័ត៌មានប្រចាំថ្ងៃ ដើម្បីឆ្លើយតបទៅនឹងរបាយការណ៍របស់ប្រព័ន្ធផ្សព្វផ្សាយថា ក្នុងអំឡុងសមយុទ្ធរួមគ្នានៅប្រទេសជប៉ុនក្នុងខែកញ្ញា យោធាអាមេរិកគ្រោងនឹងដាក់ពង្រាយប្រព័ន្ធមីស៊ីលរយៈចម្ងាយមធ្យម Typhon នៅក្នុងប្រទេសជប៉ុន និងធ្វើសមយុទ្ធពាក់ព័ន្ធ ហើយប្រព័ន្ធនឹងត្រូវបានយកចេញបន្ទាប់ពីការហ្វឹកហាត់។
លោកបានលើកឡើងថា “ប្រទេសចិនបានសម្តែងការព្រួយបារម្ភយ៉ាងខ្លាំងម្តងហើយម្តងទៀតលើបញ្ហាពាក់ព័ន្ធ។ ប្រទេសចិន តែងតែប្រឆាំងនឹងសហរដ្ឋអាមេរិកដែលដាក់ពង្រាយប្រព័ន្ធមីស៊ីល Typhon Mid-Range Capability នៅក្នុងបណ្តាប្រទេសអាស៊ី” ។
លោកបានបន្ដថា ការដាក់ពង្រាយប្រព័ន្ធមីស៊ីល Typhon MRC នៅក្នុងប្រទេសជប៉ុននឹងធ្វើឱ្យប៉ះពាល់ដល់ផលប្រយោជន៍សន្តិសុខស្របច្បាប់របស់ប្រទេសដទៃទៀត និងបង្កការគំរាមកំហែងយ៉ាងសំខាន់ដល់សន្តិសុខយុទ្ធសាស្ត្រក្នុងតំបន់។
លោកបានបន្ថែមថា ដោយសារប្រវត្តិនៃការឈ្លានពានរបស់ពួកសកម្មប្រយុទ្ធ ចលនាយោធា និងសន្តិសុខរបស់ប្រទេសជប៉ុន ត្រូវបានឃ្លាំមើលយ៉ាងដិតដល់ដោយប្រទេសជិតខាងអាស៊ី និងសហគមន៍អន្តរជាតិ៕
ប្រែសម្រួល ឈូក បូរ៉ា
