ចិនប្រកាសផ្តល់ទិដ្ឋានការដោយឥតគិតថ្លៃ សម្រាប់ពលរដ្ឋជាជនជាតិរុស្សីទាំងអស់
បរទេស៖ យោងតាមការចេញផ្សាយរបស់ RT រដ្ឋាភិបាលក្រុងប៉េកាំងបានប្រកាសកាលពីថ្ងៃអង្គារថា ប្រទេសចិននឹងផ្តល់សិទ្ធិចូលដោយគ្មានទិដ្ឋាការដល់ពលរដ្ឋរុស្ស៊ីលើមូលដ្ឋានសាកល្បងរយៈពេលមួយឆ្នាំ ដើម្បីសម្រួលបន្ថែមទៀតដល់ការធ្វើដំណើររវាងប្រទេសទាំងពីរ។
ការប្រកាសនេះធ្វើឡើងក្នុងអំឡុងពេលដំណើរទស្សនកិច្ចរយៈពេល៤ថ្ងៃរបស់ប្រធានាធិបតីរុស្ស៊ី Vladirmi Putin ក្នុងប្រទេសចិនសម្រាប់កិច្ចប្រជុំកំពូលអង្គការសហប្រតិបត្តិការសៀងហៃ ដែលលោកបានជួបសមភាគីចិនលោក Xi Jinping និងមេដឹកនាំពិភពលោកផ្សេងទៀតដែរ។
អ្នកនាំពាក្យក្រសួងការបរទេសចិនលោក Guo Jiakun បានប្រាប់សន្និសីទសារព័ត៌មានថា កម្មវិធីលើកលែងទិដ្ឋាការនឹងត្រូវបានពង្រីកដល់អ្នកកាន់លិខិតឆ្លងដែនធម្មតាពីប្រទេសរុស្ស៊ីចាប់ពីថ្ងៃទី១៥ ខែកញ្ញាខាងមុខនេះ។
សម្រាប់អ្នកដំណើរនឹងអាចចូលប្រទេសបានរហូតដល់៣០ថ្ងៃសម្រាប់អាជីវកម្ម ទេសចរណ៍ ដំណើរទស្សនកិច្ចផ្ទាល់ខ្លួន ការផ្លាស់ប្តូរ និងគោលបំណងឆ្លងកាត់។
លោក Guo បាននិយាយថាការសម្រេចចិត្តនេះបានឆ្លុះបញ្ចាំងពីកម្រិតខ្ពស់នៃការអភិវឌ្ឍន៍នៅក្នុងទំនាក់ទំនងចិន-រុស្ស៊ី ហើយមានគោលបំណងធ្វើឱ្យទំនាក់ទំនងរវាងប្រជាជននិងប្រជាជនកាន់តែស៊ីជម្រៅឡើង៕
ប្រែសម្រួល៖ ស៊ុនលី
